Myanmar-a hel pawl chuan chhim lama Shan state-a monastery-ah sipaiten mi 28 vel an that tih an sawi.
Karenni Nationalities Defence Force (KNDF) hian sipaite hian Nan Nein khua hi laipui hmangin Inrinni khan an kap tih an sawi.
Myanmar-ah hian kum hnih liam taa sipaiten thuneihna an pawnglak atang khan sipai leh anmahni duh lova ralthuam nena thawk chhuak pawlte inbeihna hi a thleng nasa hle.
Inbeihna hi an khawpui, Nay Pyi Taw leh Thailand nena an inrina laia awm, Shan leh a chhehvelah hian a nasa zual hle.
Inrinniah khan sipaite hian thlawhna atang leh laipui hmanga an kah hnuah tlai dar 4:00 (India-a tlai dar 3:00) velah an lut a, monastery chhunga lo biru khaw mite chu an that ta niin KNDF chuan an sawi.
Hnam bil sipai pawl eng emaw zat nen sipai sorkar hi a huhovin an do va, heng zinga tel KNDF-in video an tihchhuah pakhatah chuan ruang 21 vel hmuh tur a awm a, pathum chu Buddhist monk anga serthlum rawng kawra inthuam an ni a. A lan danah chuan ruangah hian silaimu luhna a awm nual hlawm a. Monastery bangte pawh silaia kah hrep a ni tih a lang chiang hle bawk.
Tual chhung chanchinbu, Kantarawaddy Times-in KNDF thupuangtu sawi a chhuah chhawnah chuan, “A lan danah hian sipaite chet dan thin anga monastery hmaa intlara kah chiam a ni tih a hriat a, rawng taka mi thatin an monk-te pawh an that tel a ni,” a ti.
KNFD hian ruang dang pasarih pawh khaw bulah hian an hmu bawk tih BBC an hrilh.
Monastery bul vela building leh in dang dingte chu hal a ni a, KNDF chuan khua hi sipaiten an rûn ngei niin an sawi.
KNDF chuan khuaa cheng thenkhat hian an mi zah tak, monk-te chenna hmunhma chu sipaite pawhin zahin an khawih an ring lo va, inhumhim nan an pan nia an rin thu an sawi a. A biru ve lote erawh sipaiten khua an luh hmain khua an chhuahsan niin an sawi.
Hel pawl sawi chauh hriat tur a awm rih a, eng chiah nge thleng hriat a la har rih hle a; mahse, Myanmar-ah hian pawisawi lo civil thahna hi a thleng fo thin a, sipaiten ro an rela nasa taka mipuiin anmahni duh lohna an tihlan hnuah a nasa zual.
KNDF hian February 25 atang khan Nan Nein chhehvel leh monastery-ah hian sipaite an chetla nasain inbeihna pawh a tam sawt hle tih BBC hnenah an sawi.
Nan Nein hi Shan state atanga Kayah state luhna kawngpui niin sipaite hian anmahni beitu hel pawlten ralthuam leh châk an lakna kawng ber niin an hria.
A mi chengte pawh inpawlh tak niin thenkhat chu hnam inhaw tak tak tak – Pa-O, Shan leh Karenni te an ni.
Pa-O National Organisation leh an sipaite hi heng lai vela sipaite lama tang an ni a. Tual chhung mite chuan sipaite hian anmahni dotuten hmun an awpte chhuhsak an nih theih nan an lamtang hnam sipaite hi thuam chak an tum nasa niin an sawi.
Tun hnai thla rei vak lo liam taa inbeihna leh do letna thlengte kal zelin Inrinnia thil thleng pawh hi a hrin chhuah niin Myanmar ram thlirtu (observer)-te chuan an sawi.
“Karenni pawlte hian khaw eng emaw zat an la a, hei hi Myanmar sipaite hian laipuiin an kap ta thin a ni,” tiin Saung Pyaung bul maia sipai outpost bula khaw hotu pakhat chuan The Irrawaddy chanchinbu a hrilh.
Inbeihna thleng thinte hian mi sang tam tak chenna tur mumal nei lova a tlanchhiattir thu tual chhunga tanpui hna thawktu pawl chuan an sawi.
Myanmar-a sipai hotute hian kuminah inthlan huaihawt theih an inbeisei a; mahse, anmahni duh lotute hi an la hneh hleihtheih loh avanga thlawhna hmang leh thil dang hmanga nasa taka an chhut thinna a la thlen reng avangin inthlan buatsaih hi thil huphurhawm tak a nih rin a ni.