Aizawl: BJP Mizoram Pradesh President Vanlalhmuaka chuan Mizorama political party dangten BJP sorkar hi an nghakhlel zawk niin a sawi.
Nimina an party pisa, ‘Mipui Rûn’-a chawlhkar thar inhlanna leh political session-ah thu sawiin Vanlalhmuaka hian, “BJP sorkar hi keini ai mah hian party dangte hian an nghakhlel zawk niin a lang. A chhan chu campaign-a kan chhuahnaah party dang hian Mizoram politics hi an lo chik em em mai a, BJP tel lo sorkarnain awmzia a neih lohzia an hriat avangin party danga hruaitu lawk leh thil hrechiang deuhte chuan BJP sorkarna thlentir hi an tum hle niin a lang a ni,” a ti.
Mizoram hi Pathianin a hmangaih em avangin mipuite tana rawngbawlsaktu ni turin Pathian a thlang nia sawiin, “Party dangte erawh chuan mipui ni lovin, mi tlem tête tan rawng an bawl thin a, chumi rah chhuah chu Mizoram pum retheihnaah an hruai a. Mi tlem tête hnenah sum a lut a, inkhuangrual lo takin vawiinah chuan Mizoram mipui dinhmun a awm phah ta a ni,” tia sawiin Vanlalhmuaka hian, BJP din chhan chu Mizoram mipuiten state dangte hmasawn ruala mahni kea dintir a nih thu a sawi.
Vanlalhmuaka hian Mizorama MLA lo ni tawhte hian mipui rawngbawl nge an nih mahni leh duhsak zawngte tan chauha thawk tih hi ngaihtuah chian a hun tawh tih a sawi a. BJP party chu Mizorama party dangte laka an danglam a; chuvangin, kumin MLA general election lo awm turah mipui hnen thleng phak hmasawnna kengtu BJP an vote ngei a rinawm ta tih a sawi bawk.
‘Mipui Rûn’-a inkhawm hi R. Vanramchhuanga, State Vice President-in a kaihruai a ni.