Premier League table chung berah Arsenal chuan an hmahruaina chu point nga ah an ti chho leh a. Fulham nen inkhelin hnehsawh takin an khingpuite lakah football hlauhawm khelin 3-0 in an chak.
Pathianni zana Craven Cottage a an inkhelh hma hian Mikel Arteta pawlte hi anmahni umtu Manchester City in Inrinni zana hnehna an chan avangin an inumnaah chetsual a pawi tawh dawn. Chuta karah an khingpui London club hi season tha hmang lai an ni ve tho.
Mahse league hmahruaitu Arsenal ngei an inlar. Man of the match a thlan Leandro Trossard-a corner pet chu minute 21-na a defender Gabriel-a’n a tauh luh hma in winger Gabriel Martinelli goal khung offside avanga pawm loh an nei der tawh.
Arsenal in goal an khung hnuah a dawt leh an zawng lehnghal, zawn rei a ngai lo. Belgian forward Trossard bawk inrawlh lehin a ball cross tha chu Martinelli tan tauh luh a harsa tawh lo.
Halftime dawnah Trossard bawkin captain Martin Odegaard goal khung tur tha zetin a siamsak bawk.
Halftime zawh lamah Fulham in chawlhlawk hma aiin football mumal zawk an khel thei. Tosin Adarabioyo hmanga goal ban an tih per bakah Bobby de Cordova-Reid chuan goal a khung teuh.
Nimahsela Arteta pawlte dinhmun a nghing hman pha lem lo. Second half-ah khup zai Gabriel Jesus chu a dam leh tawh a, minute 13 inkhel ve turin dahluh a ni.
Arsenal manager Mikel Arteta chuan, “Away inkhel a hnehna chan bakah goal venhim hi tha ka ti hle. A tirah goal pawm loh kan nei a, kha khan kan rilru a luah reng ang tih kha a hlauhawm.”
“Team-ah player hrang hrangin goal an khung thin hi a lawmawm, vawiinah Leandro a bul tumtu a ni zel a, goal pawh khung ve thei a ni.” a ti bawk.
Saints in United draw
Brazilian midfielder Casemiro chuan Premier League match thum chhunga a vawi hnih nan red card a hmu a. Table mawngphah a awm Southampton an mikhual tumin chak tura ngaih an nihna inkhelah goal inpe lovin an inhnehtawk.
Minute 34-naah Casemiro hian Carlos Alcaraz ball chhuh tumin a ‘tackle’ a. A ball zuk tlawhdan chu hlauhawm lutuk nia ngaiin VAR hmanga endik hnuah hnawhchhuah a ni.
Saints leh United inkhel a hmuhnawm zui hle a, team pahnihten goal ban an tihper ve ve a. Saints in chance ngah mahse United an paltlang thei lo.
Inkhel zawhah United manager a lawm vek lo. Erik ten Hag chuan, “Thil kan ennawn leh laiin engemaw lai bik chiah thlurbing bik a, an che lai ni lova kan thlir bik chuan thil rapthlakhmel tak tak a tam. Football hrethiam chin chuan dik lo chin, hlauhawm ni thei leh phal chin te an hrethiam vek. Casemiro hi player rorum nimahse player dik a ni.” tiin a sawi.