Khawvela raltlante awmna, refugee camp lian ber kang ta chu chhuitute chuan ‘ruahman lawk leh tum sa renga fel taka tih’ niin an sawi.
March 5-a Bangladesh-a camp kang avang hian Rohingya raltlang mi 15,000 vel chenna nei lova awmin an chenna in 2,800 vel zet a kang chhia a ni.
Sorkar thuneituin a chhuinaah camp-te hi thunun an duh avangin hel pawlin kangmei hi tichhuak niin a sawi.
Kang hi a hun inang chiahah hmun hrang hrangah a chhuak a, hei hian ruahman lawka tih a ni tih a tichiang niin Abu Safian chuan a sawi.
Cox Bazaar-a district eng emaw zata kangmei chhuakah hian thi an awm lo hlauh va; mahse, chenna in leh hmun pawimawh – sikul, medical clinic leh service point tam tak a tichhia.
A chhui turin mi pasarih ruat an ni a, thil thleng hmutu mi 150 an kawm hnuah Pathianni khan an thil hmuhte an tichhuak a ni.
Chhui zui zel tur niin a bul tantute hriat chhuah tum a ni ang.
Bangladesh defence ministry-in thla hmasaa report a chhuahah January, 2021 leh December, 2022 inkar khan Rohingya-te awmna camp-ah hian vawi 222 zet kangmei a chhuak a, heng zinga 60 chu hal luih a ni tih tar lan a ni.
March, 2021-a kangmei rapthlak tak chhuakah khan mi 15 vel thiin mi 50,000 vel zet chenna in nei lovin an awm phah.