Sikkim-a vur tla nasa takin a dan khualzin 400 vel chu sipaiten chhanchhuakin a tul angin an mamawh a ngaihtuahsak zui a, damdawi an pek bakah ei leh in turte an pe bawk.
Defence thupuangtu, Lt Col Mahendra Rawat chuan hmeichhia 142 leh naupang 50 telna khualzin 400 velte hi Inrinni chawhnu atang khan an lirthei 100 vel nen an tang a. Natu La leh Tsomgo (Changgu) atanga let leh lam an ni tih a sawi.
Trishakti Corps-a awm sipaite chuan chhanchhuah hna an thawk a, thupuangtu chuan police leh sorkar hotute nen tanghovin ‘Operation Himrahat’ tia a hming vuahin beihpui hi an thlak tih a sawi.
“Inrinni zan rei tawh tak thleng khan tanpui leh chhanchhuah hna hi thawh a ni a. Khualzinte hi hmun himah sawn chhuah vek niin an awmna tur, puan lum, dadawi leh ei leh in tur ngaihtuahsak an ni a. Sipaite hian an zavaia an riah theihna tur pawh a ruahman a ni,” tiin Lt Col Rawat chuan a sawi.
Pathianni tukah khan General Reserve Engineering Force chuan an dozer thawh chhuahpuiin kawngpui dangtu vur tlate chu an thian fai a, zing dar 9:00 vel atang chuan kawng pawh tlangin Gangtok thlenga kal theih lehnghal a nih thu a sawi.