Afghanistan ram chhung, Iran nena an inrina bul lawka customs post-ah tuialhthei phur truck thahnem tak kang avangin Inrinni zan khan kangmei rapthlak tak a chhuak a, mi 60 velin hliam an tuar.
Mipui leh thuneitute mangang chuan an thenawm, Iran-a kangthelhna hmanrua leh ambulance an ko lut niin thuneitute chuan an sawi.
Ramri khua, Islam Qala-a chengte chuan kangmei hi thelh tumin an theihtawp an chhuah a. Kangmei hi gas phur puak atanga intan nia sawi a ni a, a hnuah thuneitute a chhuah chhan tak a chiang lo niin an sawi ve thung.
Khawthlang lama Herat province Governor Waheed Qatali chuan Iranian thuneitute leh NATO kaihhruaia Afghanistan-a ram dang mi hna thawka awmte chu kang thelh tura hmanhmawh taka koh an nih thu a sawi a. Kangmei chhuak hian electric hmunpui pawh kang chhiain Herat khawpui pawhin power an nei lo.
Television-a tihlanah chuan van lam hawiin meikhu dum tak a inzial chho va, a alh sen zuai zuai bawk.
Chhanchhuah hna thawktute leh Afghan venhim hna thawktute chuan tuialhthei leh gas phur tanker thahnem tak chu a bul hnai atangin an thiar sawn.