Assam leh Meghalaya ramria buaina chuan vung thar a chhuah leh dawn em hriat a ni lo mek a, Assam Chief Minister Himanta Biswa Sarma-a’n nikuma state pahnih intihbuaina hmun, Mukroh chu an state chhunga mi a ni tih a sawi laiin Meghalaya pawhin an ram chin ngei a ni tiin an chhang let ve nghal.
State assembly-a Assam chief minister-in Mukroh khua chu ‘an state chhunga mi’ tia a sawi chu Meghalaya Deputy Chief Minister Prestone Tynsong chuan Thawhtanni khan chhangin, he khua hi Meghalaya huam china mi ngei a nih thu a sawi.
November 22 khan Meghalaya leh Assam inrina hmunah hian Assam Police, forest guard leh civil mite karah buaina chhuakin mi paruk lai an thi a, an zinga panga hi Meghalaya-a thingtlang khaw mi an ni nghe nghe a. West Jaintia Hills district, Assam-Meghalaya inrinaa awm, Mukroh khaw mi eng emaw zatin hliam an tuar bawk.
Assembly thutkhawmah BJP MLA Bidya Sing Engleng-a zawhna chu Sarma hian ziaka chhangin Mukroh khua chu West Karbi Anglong district, Assam-a mi a nih thu a sawi.
“Superintendent of Police (Border) West Karbi Anglong district hnen atanga kan dawn dan chuan Assam Police leh Meghalaya mi, ramngawa thil tiru thinte inkara buaina chhuak kha state pahnihte inkara ramri buaina nen inkaihhnawihna a nei lo,” tiin Sarma hian a chhang.
Meghalaya deputy chief minister chuan Sarma chhanna hi ‘vanduaithlak’ a tih thu a sawi ve nghal a. Tynsong-a chuan interstate boundary committee-in he thil hi an sawi chian thuai tur thu leh state pahnih inkara inbiakna kalpui mek pawh chhunzawm a nih thuai tur thu a sawi.
State pahnihte hi ramria an buaina ching fel tur hian vawi eng emaw zat inbiain boruak pawh a ziaawm hman hle a; mahse, November thlaa thil thleng hnuah hian inbiakna chhunzawm a awm rih lo.
February 27-a Meghalaya assembly inthlan neih hma khan BJP chuan an manifesto-ah Assam nena ramria an buaina chin fel ngei an tiam a, ramri-ah himna, venhimna tha leh dan leh thupek kenkawh a that theih nan outpost nghet an dah tur thu an sawi bawk.
BJP hian MLA pahnih an nei a, National People’s Party (NPP) chief Conrad K Sangma-a kaihhruai Meghalaya Democratic Alliance tangrual sorkarah an tel ve zui bawk.
Nikum March 29 khan Union Home Minister Amit Shah hriatpuinain Sangma leh Sarma hian memorandum of understanding an ziak a, hei hi an inrinaa an buaina hmun 12 an neih zinga paruk chin fel dan tur dapna tur a ni.