Huntawp dawnah Atletico Madrid in an mamawh goal an khung hmangin hnehna an chang hram a. 1-0 in Girona lakah chakin La Liga-ah pathumna an luah nghet.
Thawhtanni zanah Estadi Montilivi-ah Atletico an lenglut a. Minute 90 chhung goal an khung theih loh hnuah substitute Alvaro Morata chuan minute 91-naah an chakna goal a khung.
Morata hian tun season-ah league goal 10 a khungna a ni a. A goal khung hi pawm loh a nih zet hnuah VAR hmanga endik leh niin thutlukna sut leh a ni.
Hnehna an chan avangin palina a awm Real Sociedad lakah Atletico Madrid in point thumin hma an hruai mek a. Girona hi mahni mualah league inkhel hnuhnung pariat atang vawi khat chiah tlawm an ni a, 12-naah an awm ve mek.
Inkhel zawhah Morata chuan, “Goal ka khung chiah kha sawisel tur a awm lo tih ka chiang. VAR pawhin a endik hnua a pawm kha ka lawm hle.”
“Team tana theihtawp chhuah turin helai hmunah hian ka awm. Inkhelh reng hi chu ka duh a, midang pawh an ni ve vek a, tupawhin inkhelh reng te chu kan duh.”
“Nitin rim takin ka thawk a, ka inpekna leh ka hnathawhah ka lungawi. Inkhelh reng loh chuan khelmual luh a han chetthat nghal mai te hi thil harsa a ni a. Mahse kan kal dan hi kan chhunzawm zel a pawimawh.” tiin an tanrual a pawimawh thu a sawi.