BJP chuan tun hma zawnga an chak theih ngaih lohna, India hmarchhak hmun zau tak an awp hnuah an chet theih lohna dang, Kerala lam an thlir leh ta a. Hindu ni lo sakhaw pahnih – Muslim leh Kristian rilru hmin tumin beihpui an thlak dawn.
Kerala-a cheng 46% zet hi Muslim leh Kristian an ni a, heng mite hian BJP hi an hnawl miau avangin politics-ah chuan Left leh Congress bupui a ni.
Kum 2019 Lok Sabha inthlan dawnah khan BJP hian an bei viau tawh a; mahse, hlawhtlinna an chang zo chuang lo.
Hemi tum hian Congress chuan bial 20 awmah bial 15 zet an la a. An thawhpuiten pali an la bawk a, Indian Union Muslim League-in pahnih leh Kerala Congress (Mani group) leh Revolutionary Socialist Party ten bial khat ve ve an la a ni.
Lok Sabha inthlan result hian mi chengte hian sakhuana zawngin thil an thlir hle tih a lang.
Hemi hnuah hian anmahni thlawptute leh Left te intihbuaina chhuak zauh zauh mah se BJP hi an thang ve hret hret tho.
Tun tuma beihpui an thlak dan tur ruahmanna an neihah chuan BJP worker-te chuan Easter Week an tihah Kristian in a tam thei ang ber tlawh an tum a. April 9-a Isua Thawhleh Ni-ah phei chuan worker 10,000 zetin Kristian chhungkaw nuai khat tal tlawh an tum.
Nikum Krismas-ah pawh khan BJP worker-te hian Kristiante hi thilpek hlanin an inah an lo tlawh hlawm tawh nia sawi a ni.
Right-wing worker-te hian Muslim-te hunpui, April chawlhkar khatnaa Eid lo thleng turah an ina tlawh an tum bawk.
April 15-a Vishnu lo thleng turah pawh Kristiante hi right-wing activist-te ina tel ve tura sawm an ni dawn bawk.
BJP hruaitute chuan mi pangngai chuan an thil ruahman hi tha an ti hlawm hle tih an sawi a, rorel lai, Left leh eptu, Congress pawhin an thlithlai ve reng tih an sawi bawk.
Kerala-a sakhaw pahnih zuitute hnena beihpui thlak hi Prime Minister Narendra Modi-a rawt chhuah nia ngaih a ni a, Hyderabad-a an party national executive thutkhawmah an mite chu Kerala-a sakhaw zuitu thlem zawk hnen thleng tura che chhuak turin a fuih a ni.
Hmarchhak state pathuma hnehna an chan hnuah Modia hian Delhi-a BJP headquarters-a hun hmannaah kum 2026-a Kerala assembly inthlanah chuan an telna sorkar a din ngei tur thu a sawi a ni.
Hemi tihlawhtling tur hian Kristiante thlawpna an mamawh a, chutiang chu hmarchhakah pawh a thleng tih a sawi a ni.
Modi-a hian Kerala-a inep pahnih, Left leh Congress chu Tripura-ah chuan an tang dun leh daih tih a sawi bawk.
BJP hian ‘Thank Modi’ programme buatsaih an tum bawk a, hei hi Kerala-a sorkar laipuiin project a neih chhawrtuten an chhawr dan an sawi chhuahna tur a ni a. Tunah mian mi 12,000 vel hnenah ‘Thanks Modi’ video chu Malayalam tawngin an thawn chhuak tawh.