India chu kum 2022 chhunga khawvela ram boruak bawlhhlawh ber pariatna dinhmun a hauh va, a hma kuma pangana atangin a ziaawm hret.
PM 2.5 level pawh 53.3 micrograms/cubic metre-ah a tlahniam a; mahse, World Health Organisation-in mihring tana him chin a tih aia a let 10 vela sang a la ni tho.
Swiss firm IQAir-in ‘World Air Quality Report’ a siam hi Thawhlehni khan tihchhuah a ni a. Boruaka bawlhhlawh awm, PM 2.5 an tih awm zat atangin scientist leh hriselna lama mi thiamten an teh behchhana siam a ni.
Ram 131-ah boruak bawlhhlawh dan entu, monitor 30,000 chuang behchhan hmanga report hi siam niin monitor zingah hian sorkar hnuai leh hnuai lova mi an ni hlawm.
Khawpui 7,300 chuang zir zingah Indian khawpuite chu khawvela boruak bawlhhlawh ber berna a ni hlawm a, kum 2017 kha chuan khawpui 2,200 chaun en niin tunah chuan a tam tawh hle.
Report-ah hian boruak bawlhhlawh avanga India eibar dinhmun a nghawngna hi $ tluklehdingawn 150 zet niin tar lan a ni.
India-a boruaka OM 2.5 titamtu ber chu veivahna hmanrua niin 20-35% vel zet a thawh nia tar lan a ni bawk a. Industry khu chhuak, lungalhthei hal hmanga power plant leh thlai tawih hal khute chu boruak tibawlhhlawh zualtu an ni bawk.
Pakistan-a Lahore leh China-a Hotan chu khawpui boruak a bawlhhlawh ber berna a ni a. Rajasthan-a Bhiwadi chu pathumna niin Delhi chu palina a ni bawk a. Delhi-ah hian PM 2.5 level hi microgram 92.6 zet awmin a him chin let 20 zet a ni.
Khawpui bawlhhlawh zual 10 zingah hian Indian khawpui paruk an lang a, bawlhhlawh zual 20-ah 14 an lang a, bawlhhlawh zual 50 zingah 39 an tel a, bawlhhlawh zual 100 zingah 65 an lang bawk a. A hma kum kha chuan bawlhhlawh zual 100 zingah hian 61 a lang a. Delhi leh New Delhi chu bawlhhlawh zual 10 zingah an tel ve ve bawk.
India-ah hian Kolkata chu Delhi dawta boruak bawlhhlawh berna a ni a; mahse, an kar a zau thung a. Chennai chu thianghlim sawt zel mah se WHO-in a him chin a tih aia a let nga vela sangah a la awm reng tho.