Aizawl: Mizoram Pradesh Youth Congress Committee (MPYCC) chuan nimin khan thuchhuah siamin Dampa Tiger Protection Force-te hlawh a batsakte a rang thei ang ber pe thuai turin Mizoram sorkar an phut thu an tar lang.
Congress Thalai hian Mizoram sorkarin Dampa Tiger Protection Force-ten thla ruk lai hlawh an la thei tawh lo chu pawi an tiin an lainat takzet thu an sawi a. “Mizoram sorkarin an hlawh a batsakte a bo a bang awm lovin a rang thei ang bera pe nghal turin kan phut a, an tihlawhtling thei lo a nih chuan an thlavang hauhin hma kan la zel dawn a ni,” an ti.
MPYCC chuan hlawh batsak an nihna chhan hi an zirchianna atanga a lan danin Mizoram Finance Department lamin Dampa Tiger Reserve field director account lama pawisa an pek chhuah har vang leh EF&CC department, Mizoram lamin 1st Instalment an hmanna leh an hman chhuahna (utilisation certificate) central lama an thawn thlak har vang a ni.
“Mizoram sorkar Pu Zoramthanga kaihhruaiin sum a enkawl thiam loh vang leh an inthlahdah vang liau liau a ni a. Central atanga sum lokalte a hmanna tur dik tak ni lo thil danga hman pen leh pawh penin a hrin chhuah harsatna a ni,” MPYCC chuan an ti.
Dampa Tiger Protection Force-ten an hlawh an lak theih miau loh avangin Dampa Tiger Forest Reserve chu tunlai hian tihchereu mek a nih thu leh duty an awm loh avangin a ruka sapel leh lui kal an pung thar hle nia sawi a ni leh zel nia sawiin, “Sorkar tha lo leh a ngaihna hre lo hnuaiah Mizoram rohlu Dampa Tiger Forest Reserve kan chan mek a ni,” an ti bawk.