Aizawl: Larsap Hari Kambhampati-a’n nimin khan Raj Bhavan-ah agriculture department hotute leh an thawhpui, Godrej Agrovet Ltd leh Patanjali Foods Limited aiawhte a kawm a. Mizorama hriak atana sawr chi thlai thar chhuah dante a sawipui.
Larsap chuan India ramin kum khat chhunga hriak ei chi a mamawh zinga zaa sawmruk chu ram dang atanga sum tam tak senga lei thin a nih thu sawiin, pulse – dal, bekang, chana leh a dangte pawh ram chhunga tharin ram mipui mamawh a phuhruk zawh loh nasat thu a sawi a. Hriak atana sawr chi thlaite intodelh tura sorkar laipuiin hmachhawp pawimawh tak a neih thu leh hemiah hian Mizoram pawhin tih theih a neih te a sawi.
Agriculture department leh a thawhpui company-te chu NMEO-OP inkhaihruaina anga theihtawp chhuah tur leh kuthnathawktute kaihruaia an hmalaknate endikpuia oil palm leh hriak chang thei thlai chi dangte thar chhuah kawnga hmasawnna a awm theihna tura tan la turin a fuih a ni.
Agricultute department hotute chuan hriak atana sawr chi thlai leh be chi hrang hrang leh oil palm thar chhuah kawnga Mizoram dinhmunte larsap chu an hrilh a. Mizoramah oil palm chin theihna hmun ram Ha 26,730-a zau awma chhutah Ha 3,398-a zauah chin a nih thu leh khaw 193-ah kuthnathawktu chhungkaw 2,733-ten oil palm huan an enkawl mek thu an sawi.
Oil palm bak hriak atana sawr chi thlai chi dang – antam, bekang, chhawhchhi leh a dangte chu Ha 3,024-a a zauah chin mek a nih thu leh Mt 3,158 vel thar chhuah thin a nih thu agriculture deptt. hotute chuan an sawi.
Agrilculture department hotute chuan a hlawm lian deuha hriak chang thei thlai chite lakkhawm a nih theih nan oilseeds chingtute intelkhawmna pawl din a ni tawh tih an sawi a. Tunah chuan awmze nei zawkin hmalakpui theih an ni tawh dawn tih an sawi.
SEDP hmalakna kaltlangin bekang chi tam tham tak nikum lamah sem chhuah a nih thu leh chumi a lo thar hunah oilseed thar chhuah zat pawh a pun belh an beisei thu an sawi bawk.