MHIP General Hqrs. chuan nimin khan Aizawlah Gutkha Product Do hawnna hun an hmang a, kalkhawmten kawng an zawh.
Gutkha Product Do hawnna inkhawm tawi, Millennium Centre tualzawla neih hi MHIP General Secretary Lalliani’n a kaihruai a, President Ngurmawii Sailo chuan Gutkha Product Do beihpui a hawng.
MHIP president chuan gutkha product chu mihringte tana hrisel lohna thlentu, thalaite nun tichhe mektu a nih thu leh hetiang thil tha lo hi do a tul takzet avangin nuho an che chhuak ta tih a sawi a. Mihring hriselna tichhetu zuar thinte pawh an thil zawrh that lohzia hriaa zuar lo ngam tawh tura an chah thu leh sorkar pawh hetiang zawrh khapna dan a neih chu khauh zawka kalpui tura an phut thu a sawi.
Millennium Centre tualzawla hun an hmannaah hian Dr. H. Lianthangpuia, Joint Director & State Nodal Officer, NTCP chuan gutkha that lohna te, taksain a chhiatpui theih dan hrang hrang leh hemi avanga cancer leh natna dangte a kai theih dan te a sawi.
MHIP member kalkhawmte chuan Millenium Centre tual atanga Vanapa Hall tual thlengin kawng an zawh a, gutkha that lohna thuziak an ken bakah he product khap kawngah sorkar chu khauh zawka hma la tura an phut thute an aupui a, Vanapa Hall tualah hun an hmang leh bawk.