Aizawl: SEDP Governing Board chu nimin khan an chairman, chief minister Zoramthanga hoin an thukhawm a. Chhungkaw lam hawi (family oriented) SEDP sem zel dan tur leh sum hman dan turte an sawi ho.
CM Conference Hall-a thutkhawmah hian sorkar kum thar, 2023-2024 chhunga SEDP sum hman dan tur te, tuna a dawngtu tur chhungkaw thlan tawh bak a dang thla dan tur te, sum sem hun tur leh ngaihtuah tur pawimawh dangte an sawi ho a. Sorkar kum kal mek, 2022-2023 chhunga a dawngtu tur chhungkaw 60,000-te hnenah sum sem chungchangah a thawh hnihna chu a kaihhnawih department-te hnenah pek chhuah a ni tawh a ni.
SEDP dawngtu tur chhungkuate hnena kimchang taka pek thuai a nih theih nan tun thla ral hma hian buaipui ngai tur zawng zawng chu tihfel tura bawhzui nghal an rel bawk.
Thutkhawmah hian board chairman bakah Deputy Chief Minister Tawnluia, Minister Dr. R. Lalthangliana, Lalchamliana, R. Lalzirliana, K. Lalrinliana, Lalchhandama Ralte, Lalruatkima leh T.J. Lalnuntluanga te an tel a. State Planning Board Vice Chairman H. Rammawi leh Planning & Programme Implementation Secretary Lalmalsawma Pachuau te an tel bawk.