Italy champion lai AC Milan chuan a zawna inelna hrang hranga vawi thum chak hmel an hmuh lohna ni turin Salernitana lakah point an hloh a, 1-1 in an inhnehtawk.
Thawhtanni zana San Siro a inkhelah Milan hian Olivier Giroud hmangin halftime dawnah goal khung mahse second half-ah Salernitana forward Boulaye Dia chuan an si phurh a sut.
Milan in kum 1994-95 season atanga a vawikhatna atan Italian player tel miah lovin starting XI an rem a. Table mawng lama awm club lakah chungnung hle in goal-ah vawi 24 lai ‘shot’ an nei.
Rafael Leao, Brahim Diaz leh Giroud ten chance tha an hloh vek a, second half-ah defender Alessandro Florenzi leh striker Zlatan Ibrahimovic te pawhin chakna goal an khung teuh thei viau.
Stefano Pioli pawlte hian point 48 hmu mekin league-ah palina an ni a, point 20 in hmahruaitu Napoli an phak loh avangin an tan a sang pali zinga tel tum bak beisei tur a tam tawh lo.
Inkhel zawhah Pioli chuan, “Taksa ah emaw kan rilru lama inpeih lohna leh tlakhniam lam a ni lo. Chak turin kan bei nasa tawk lo mai a ni.”
“Goal ven theih tak kan chhuah a, kha khan inkhel a thlak danglam a, ngai kan awh leh thei tawh lo. Point thum hmuhna tur kan hloh.” tiin inkhel zawhah a sawi.