Sikkim Chief Minister PS Golay chuan Sikkim Police-a Director General (DGP) A Shankar Rao hnenah an state police zawng zawng chu ruihhlo (drugs) an ti em tih finfiaha endik (test) vek turin a ti.
Chief Minister Golay-a hnen atanga police-in thupek an dawnah chuan he test paltlang zo lote chu an hna chân nghal tura tih an ni bawk.
“Sikkim-a police zawng zawngin drug test hi an paltlang ngei tur a ni a, lo ti thin man chhuah chu an hna atanga chawlhtir an ni ang,” a ti.
Chief minister-in hetiang thupek a chhuah chhan ber hi Himalaya tlangdunga awm state-a police zingah ruihhlova talbuai tam tak an awm tih sawi thawm a rin hle vang a ni.
“Police tam takin ruihhlo an ti thin ngei nia hriat a ni a. State sorka chuan police force tha tak neih a duh a, drug test neih hian nakin zela ruihhlo an tihna turah pawh a veng ang,” tiin chief minister hian a sawi.
A hmain Golay-a hian Sikkim chu ruihhlo leh a ti awm lohna (drugs-free State) ni tura tan a lak thu a lo sawi tawh a. State sorkar hnuaia thawkte chu ruihhlo an ti a nih chuan na taka hrem an ni dawn tiin a lo vau tawh.
“Police chauh an ni lo, sorkar hna thawk dang, ruihhlova inhnamhnawih chu an hna atanga chawlh luihtir an ni ang,” a ti.
Police zawng zawng endik tur tih thupek chhuah hma lawk hian an state-a ruihhlo tawlhna lian ber hai chhuah a ni a, hetah hian Assistant Sub-Inspector pawh man tel a ni nghe nghe.