Pakistan-a rorel lai eptu lian ber, Imran Khan-a lamtangte leh amah man tuma thawk chhuak police-te chu a chenna in bulah nasa takin an innawr.
Police hian lung leh leirawhchan hmanga anmahni vawmtu mipuite hi an darh theih nan mittui tlakna hmangin an phuh.
Lahore khawpuia Khan-a in compound pawn lamah chuan boruak a tang hle a, a ina luh ngei tumin police hian an nawr let a ni.
Khan-a hi prime minister a nih laia dan lova sorkar thil hralha puh a ni a. Amah erawh chuan politics thila a chunga phuba lak tumna mai niin a sawi thung.
Police hian a hma pawhin man an lo tum tawh a, an man thei lo va; mahse, tun tumah hi chuan kum 70 mi, Khan-a hian lung in a luh ngei tawh a rin thu BBC hnenah a sawi.
“Tan in pindana zan hun hmang turin ka rilru chu a inbuatsaih fel tawh,” a ti a. “Zan eng zat nge ka riah dawn chu ka hre lo va; mahse, ka inbuatsaih vek tawh a ni,” a ti.
Prime minister hlui hi mittui tlakna hmanga phuhna khu chuai karah pawh a inlan a, heng thilte hi a compound chhung ngeia vawm luh a nih thu a sawi bawk.
Thuneitute chuan an ram inthlanpui lo awm tura amah leh a kaihhruai party-in an chuh ve theih loh nan man an tum mai niin a sawi.
“Lung inah ka awm a nih pawhin kan party-in hnehna kan chan chu tumahin an dal thei lo vang,” a ti.
Khawpui lian dangah pawh amah thlawptute chuan man tum duh lohna hi an lantir ve bawk.
Khan-a hi nikum April thla khan prime minister atanga paih thlak niin amah thlaktu, Shehbaz Sharif-a chu thu sawi leh chet dan chi hrang hrang hmangin nasa takin a bei a, a nawr reng bawk a. Kumin kumtawpa inthlan hun lo awm tur chu a hma lama ti turin a nawr tel bawk.
November thlaa a kea hliam a tawrh phahna beih a tawh pawh kha Sharif-a’n thah a tumna a nih thu a sawi tawh thin bawk.