- Dr. C. Lalrampana
A KAMKÊUNA
Kum 3,500 kal ta, Hebrai calendara thla 3-na Sivan 6 lai vel khan Sinai tlangah Pathianin Mosia hnenah thusawmpek, Torah & Oral Law thlengin a pe a. Mithiam zawkte chhut danin hetih lai hun hi kum zabi 13-na leh 16-na inkar lai vela thil thleng kha niin an ngai a ni. Heng dan lungpheka ziak leh thu ngawta dan leh dun zawm tur a pekte hi tun lai tawng takin ‘constitution & manual bye laws’ ti ila a dik zaw ber mai awm e. Pathian kutzungtang ngeia ziak thusawm pekte leh dan tesepte hi Israel fate khan an zãwm loh chuan Pathianin a thungrül thin a, chawplehchilhin an tuar nghal zel thin. Tichuan sinai tlânga Amah (Pathian) a biak zawh khan thuhriattîrna lungphêk leh thusawm pek lungphek pahnih chu Mosia A pe a ni. (ex. 31:18).
DAN PAWIMAWHNA
Khawvela dãn awm hmasa ber chu Gen. 2:16,17-a tarlan kan thlahtu Evi leh Adamate zawm tura Pathianin dãn a pekte kha a ni. A dawttu chu Pathianin Mosia kaltlanga dan leh thupek mipui zawm tura horeb tlanga A pekte kha a ni a, a pawimawh hle. Heng baka khawvela ziaka fel taka dãn (written constitution) awm hmasa ber chu San marino kum AD1600 vel atanga hman tan kha niin USA hi khawvela danpui (constitution) nei hmasa ber chu niin a ngaih theih. Khawvel ram hrang hrang zingah hian ziaka fel taka dãn nei an awm laiin ziak loh dan fel tak nei pawh an awm nual a; chungte chu Canada, China, Israel, New Zealand, Saudi Arabia, & United Kingdom-te an ni. Khawvelah hian ram 195 zet awmin chung zinga 193-te chu UNO member an ni a, ram 2 Taiwan & Kosovo-te erawh thlirtu (observers) an ni. Heng Ram hrang hrang ziak loh dan leh ziaka dan neihote pawh hian Pathian thusãwm pek beh chhan vekin dãnte hi an duang a, an ram leh hnam mipui sukthlek mil tawk zelin an her rem mai chauh zawk a ni. Dãn hi chu a pawimawh hle aniang Isua ngei pawh khan- “Dan thu emaw, zawlneite thu emaw tiboral tura lo kal ka nih ring suh u; tiboral tura lo kal ni lo va, tifamkim tura lo kal ka ni zawk.(Mat. 5:17) a ti a; tirhkoh Paula pawh khan-“A nih leh, rin avangin Dãn chu engmah lovah kan siam em ni? Hnai lo ve, Dãn chu kan tinghet zawk a ni.(Rom 3:31) a ti bawk a ni. Dãn mumal awm lohnaah chuan mipui an tla dah fo thin a, roreltute tan a buaithlak duh hle thin.
SORKAR DÃN
Khawvel ram tinte hian dan leh dun tha tak an nei theuh a, mipui rorelna ram a ni emaw communist, dictator,, sipai rorelna (military regime) a ni emaw, eng sawrkar pawhin rorelna kengkawh se inkaihhruaina dãln leh dun mumal tak (act) an nei ngei ngei thin. Ram hruaitulute chauhin mipui rawng bawl hna an tlin bik lova; anmahni puibawmtu tur mipui mamawh phuhruktu tur hnathawktu hlawh neia chhawr engemawzat an lak a ngai thin. Chutianga puibawmtu tur an lakte chu sawrkar hnathawk (Government servant) tih an ni a. Sorkar hna lak dan mumal tak (recruitment rules) dungzuiin hna hniam ber atanga a sangber thlengin lãk (recruit) an ni thin. Chungho enkawlna tur chu dan leh dun (service conduct rules) felfai tak siam a ni a, an thawh ngheh (regularize) dan, hlawh zat, awmhmun sawn leh siamrem, siksawi leh ban, hrem, pension dan tur. thlengin dan leh dun fel tak hnuaiah hnathawktute chu phuarbeh an ni. Chung an hnathawkte enkawlna tur dan (act) chu rorelna in sang berin a pawm (passed) hnuah hman thin a ni.
SAWRKAR CHU TUNGE?
Sorkar chu mipui chunga roreltu pawl awmze neia inhlãwmkhãwm, ram hlãwn (state) khat chunga roreltu pãwl, thuneihna sang tak nei a ni a; sorkar chuan rorel theihna tura dan zam theihna (legislature) neiin chu chuan rorelna kengkawhtu (Executive) leh Rorel dan hmang (judiciary) a nei ngei ngei thin. Sorkar inrelbãwlna tha leh tha lo, inkaihhruaina tha, leh tha lo, langtlang sorkar, mipui huapzo sorkar leh lang tlang lem lo, mipui huapzo lem lo, sorkar hrawn khirh takte pawh a awm thin. Ram bial/hlãwm khat chunga roreltu inhlawmkhawm pawl chu sorkar kan tih hi a ni. Khawvel ram hrang hrang chunga roreltu sorkar erawh kan chenna hmun leh ram a danglam angzia zelin a inang vek kher lo. Khawvelah hian mipui rorelna ram (Full democracies 23; Mipui rorelna deuh reuh (Flawed democracies) 52; sipai & mipui rorelna inkawp (Hybrid regimes) 35; Authoritarian regimes 57; an awm a, tin, one-party states (dictator) kan tih hi China, Cuba, Eritrea, Laos, North Korea & Vietnam-te an awm a, Sahrawi Arab Democratic Republic pawh hi one-party state ni tho mah se UN-in a pawm rih lo. Heng bakah hian mali, chad, guinea, Sudan, myanmar-te hi sipai rorelna a ni a, kum 2021 thleng khan sovereign states (monarch head of state) ram 43, awmin . Asia-ah 13, Europe-ah 12, North America-ah 9, Oceania-ah 6, & Africa-ah 3 an awm bawk. Heng ram hrang hranga roreltu sawrkarte hian an thuneihna huamchhungah chuan an duh ang angin ro an rel thei a, an hnuaia hnathawktute thununna thuah pawh an duhdan danin dan & dun an siam thei bawk.
A TLÃNGKAWMNA
India ram hi dan leh dun ngah, democracy ram lian leh hlawhtling ber kan ni. Hetiang hi ni mah se, tunlai kan Zoram dinhmun hi ngun taka thlirin dån mumal nei lo ang maiin kan khawsa ta ni berin a lang. Sorkar department hrang hrangte hian dan mumal tak (office of procedures) nei reng si hian a chhunga thawktute leh a dawrtu mipuite inkarah hian dãn pawisaklohna lian tak awm tawn thin a awm niin a lang. Sorkar hnathawk tan Aikal lak phal loh a nih reng laiin aikal la an tamzia leh an aikal lakte pawhin aikal lehchhawng an la lehzel ngam nitea sawi a awm thin; kawngpui bula in kan sak dãn te, kawngpui nek rana biak in kan sak dãn te, MR bill & GPF (NRW); retirement benefit; contract bill; driving licence; work order; tender notice etc. leh bill dang dang pawh serial no. leh seniority indawta lak mai thin tur a nih laiin mi pamham thenkhatte avangin dan hian awmzia a nei ta meuh lo chu a ni ber e. A hnuhnung ber pawh a hmasa berah a awm thei a, a hmasa ber pawh a hnuhnung berah awmin a lai leh laklawha awm pawhin a hmalama mite a kal kãn teuh thei tihte leh dãn lo anga thiltih hmuh tur a tam ta hle niin a hriat theih. Sum thiltihtheihna (money power) hian Zoram mipuite rilru a ei chhe hneh hle tawh em ni le? Court rorelna, khawtlang rorelna, sorkar rorelna, NGO, Pressure group, Kohhran rorelna, inthlan (Election), political party-ah leh hna chihrang hrang lãk danah pawh sum thiltihtheihna (money power) hian hmun a awh zau tial tial niin a lang ta. Burma ram sipaiin a awpbehleh hma lawk khan Sorkar Ofiice-a file umzui nan, hmun leh hmuna office peon tirh kual vel nan sum tam tak tak sên a ngai fo thin niin an sawi a; hetiang dinhmun hi kan hlat ta bik hauh lo mai! Chuvangin, dãn hian awmzia a nei ta meuh lova dãn lo hi dãn a ni zo ta zawk emaw tih mai tur a lo ni e.