Record engemaw zah siam a nih zanah Manchester City leh Erling Haaland te Europe a football club-te hmaah an inlar a. Hlawhtling tura an intlansiakna kawngah tu tan pawh el tham an nihzia lantirin RB Leipzig lakah goal sarih an khung a. Striker Erling Braut Haaland-a’n goal nga a khung.
Goal thun khawl
Etihad Stadium-ah Manchester City in an German mikhualte hnehsawh tak maiin an lo nghaisa a. 1-1 a first leg a an inhnehtawkna chu 8-1 aggregate-ah an chantir.
City chakna hnar chu striker Haaland a ni. Ani hian Europe huap club inelna lian berah hian goal 30 khung tling thei naupang ber leh khung tling thei hma ber record a siam.
Hei chauh hi a la ni lo. UEFA Champions League inkhel vawikhat a goal nga khung tling thei pathumna a ni a. Argentine legend Lionel Messi leh Brazil forward Luiz Adriano te hnung a zui.
Kum 22 mi hian tun season-ah inelna hrang hrangah goal 39 a khung tawh. Manchester City player in season khat a goal a khung hnem ber tum a hmang mek a, record a ni tawh.
Tun season-ah hattrick vawi nga siam tawhin Europe huap inelna lianah ani tih lova hattrick siam hnem in vawi thum in a pha lo.
Borussia Dortmund a amah enkawltu Marco Rose-a pawlten inkhel tan hnu lawkah zan hautak a ni dawn tih an hre nghal. Defence atangin Nathan Ake-a’n thui taka ball a pet chhuah chu Haaland-a’n a um lut. Goal-ah tlang nghalin goalkeeper Janis Blaswich chuan a lo dang hram. A bak erawh dang leh tawh lovin minute 22-naah penalty atangin goal hmasa a khung a. 24-naah chhunzawmin halftime dawnah hattrick a siam a. Minute 53-na leh 57-naah a khung belh bawk.
City in kum 2019 a German club tho Schalke an hnehna zat chiaha hnehna an chan leh zanah hian Ilkay Gundogan chuan goal mawi a khung a. Huntawp hma in Kevin de Bruyne chuan an goal hnuhnung ber a khung.
Kumin a ni tawh ang em?
Manchester City hian tunhnai kum nga chhungin England lam awp hneh mahse Europe inelna lianah an tum ram an la thleng thei ngai lo.
UEFA Champions League chawi an duh avangin Pep Guardiola an lalut. Mahse vawi hnih chawi tawh manager pawhin a hlawhtlinpui thei rih lo.
Kuminah champion tumin zinkawng an zawh leh a, knockout stage fiahna atan RB Leipzig fakawm viau mahse team pahnih inkar a awm tih a hmuh theih. Hemi belhchhah turin tunhnai a sel hlawh leh thin Haaland-a’n thildang chu engpawh nise goal khung kher kher chu a hnehsawh tih a lantir a. A goal khungte hi ‘finishing’ tha pholanna vek an ni.
A manager Guardiola chuan a player chungchang sawifiahin, “Goal nga a khung kha a ropui. Mahse goal hnih thum tal kan khung loh chuan sawisel a hlawh ta bik thin.”
“Vawiinah goal nga a khung a, mahse chu lam aiin ball kha vawi 35 vel a tawk. Kha kha kan duh chu a ni. Ball nghak a goal khung tum ringawt lovin team inkhelah a inrawlh ve a, team tana a thawhrim a a tlan hnem khan a fin phah a, a hriam phah zawk dawn.” tiin a sawi.