Chief minister, finance changtu ni bawk, Zoramthanga’n Mizoram chu state dangte nen khaikhin leiba nei tlem berte zinga mi a nih thu sawiin, Mizoram aia leiba nei tlem chu Sikkim chauh a awm thu a sawi a. State lian leh hausa zawk, economy dinhmun tam zawkah leiba zat a tam zel niin a sawi.
Mizoram Journalists’ Association (MJA)-in an member-te tana Aijal Club-a state budget zirhona seminar nimina an buatsaih a hmanpuinaah he thu hi chief minister chuan a sawi.
Kum eng emaw zat finance department changtu minister a lo nih tawhnaa a tawnhriat leh tuna sorkar sum dinhmunte chipchiar takin a sawi.
Chief minister chuan hmasawnna hna hrang hrang thawhna tur loan lak a nih thin thu sawiin, a rulh danah tunhma chuan 90%-te India sorkarin rulhsakin 10% chauh state-in a tum thin thu a sawi a. Tun hnuah erawh chuan hei hi tihsan a nih thu sawiin, tuna ADB atanga health care atana sum puk pawh sorkar laipuiin 72% a rulh tur thu a sawi.
Budget siam a nihin sum hman dan tur leh mamawh dan tur kimchang taka hriat lawk vek theih a nih loh avangin a kar laka mamawh belh te, sum hmuh danah te danglamna a lo thlenin a tul anga supplementary demand siam a tul chang a awm thu chief minister chuan a sawi a. Covid-19 leng avanga sum dinhmun tun thlenga a la nghawng dante sawiin, sum, a hmanna tur bituk sa, project based sanction-te chu vaibelchhe tam tak pawh ni se, thil dang atana pawhpen theih a nih loh thu a sawi.
Hlawh leh thil dang atana hman theih tur, ‘untied fund’ chu sum indaih lohna ber a nih thu leh, chu chu state tin atanga sorkar laipuia chhiah tlingkhawm atanga state-in an dawn ve tur – share of taxes te, revenue deficit grant te, state-in a thawhchhuah ve chi hrang hrang chhiah lakkhawm te, hmun dang atanga ba rulhna hmuh leh a dangte a nih thu chief mInister chuan a sawi a. Sorkar laipui remtihna vek behchhana budget siam a nih hnuah Covid hripui leng avangin share of taxes leh hmun dang atanga sum hmuh tur hmuh a nih tak loh thu a sawi a. State-in a hmuh theih tur a hmuh tak loh chu Rs vbc 3,000 vel nia chhut a nih thu a sawi.
“Bill pek loh tam tak pek ngei ngai site chu budget tlem zawk atang chuan rulh chhunzawm zel a ngaih tho si avangin, share of taxes kan hmuh tur ang kan hmuh tak loh chu a hnawh khahna a awm tawh bawk si loh avangin sum harsatna a thleng ta niin chief minister chuan a sawi a. Mipui phurrit siam belh zawng ni lova sum mamawhna phuhruk tura remchanna zawna resource mobilization lam ngaihpawimawh tul a tih thu a sawi bawk.
MJA member-te hi Addl. Secretary, Finance Ramchuana’n budget chungchangah hian zirtirna a pe a ni.