India khawthlang lam, Maharashtra-a lo neitute chuan purunsen man tihsan phutin km 200 zet kawng zawhin Mumbai an thleng.
Lo neitute lungawi lohna avang hian thuneitute chuan suma purunsen chingtute puihna tur pawh a ruahman a; mahse, lo neitute chuan he rawtna hi hnawlin an thil phut lantirna chu an kalpui zel dawn tih an sawi.
Nashik district-a purunsen chingtu, Namdev Thakare chuan a thlaite chu hlawhfa ruaia senga hralh a tum loh thu a sawi a, a insen ang zat sum a hmu let dawn chuang lo niin a sawi a. An chhungkaw lovah chuan purunsen a tawih phah nasa hle.
Thakare-a hi Maharashtra-a tun hnaia purunsen man tlahniam nasa lutuk duh lova pungkhawm tam tak zinga mi a ni a. An zinga thenkhat chuan an thlaite halin chief minister koh eih an tum a, thenkhat phei chuan purunsen chu parcel-ah Prime Minister Narendra Modi hnenah an thwn hial.
Purunsen man tlahniam leh duh lohna hi kum tin deuhthaw thleng thin a ni.
India hian kum khatah tonne maktaduai 24 vel thar thinin China dawta thar tam ber a ni a. India-in a thar zinga a zahve aia tam hi Maharashtra atang a ni a. India-in a thar zinga 10-15% vel hi ram dangah a thawn thin.
Purunsen hi India-ah chuan thlai pawimawh tak niin chawhmehah an telh nasa hle a. A tawih hma em em thung.
Politics khelh nan pawh hman a ni nasa a. Thar chhuah a tamin a man a tlahniam a, lo neitu sang tam tak tan buaina a ni a. Thar chhuah a tlemin a man a sang a, a leitute thinrimin sorkar chu tihniam turin kar a ni veleh tho thin.
Thuneitute chuan Maharashtra-a a man a tlakhniam vak chhan hi hmar lama mihring chen tamna state-ten an mamawh tlem tak vang niin an sawi a. “Uttar Pradesh, Bihar, Rajasthan te chuan purunsen hi an seng ve thei tawh tlat a ni,” an ti.
Lo neih lama mi thiam, Shrikant Kuwalekar chuan sik leh sa inthlakin thar chhuah a nghawng a, chu chuan a man pawh a nghawng zui lo thei lo niin a sawi.
India-ah hian purunsen hi kum khatah vawi hnih chin thin a ni a. Fur laia chin chu December thla tawp leh January thla tirah an seng thin a, hengte hi a tha vak lo va, zawrh chhuah thuai thuai a ngai a. Thlasika chinte chu March thla laihawlah an seng thin thung a, heng hi chu hun rei zawk dah that theih a ni.
“Nikum khan July-August khan ruah a sur nasa a, lo neitute hian an chin tlai phah a, hei hian March thlaah nghawng a nei ta a, December-January zawrh chhuah tur kha a tlai ta a ni,” tiin Kuwalekar chuan a sawi a. Chawlhkar reilo teah thlasika chin an seng dawn bawk a, chumi hunah chuan a man hi a nghawng lehzual thei dawn niin a sawi bawk.
Nashik-a lo neitute chuan a hlawma an hralhin kg 100-ah Rs. 200-400 bak an hlep phak lo tih an sawi.
Maharashtra-a lo neitu hruaitu, Ajit Navale purunsen hi kg 100 zel Rs. 1,200-a an hralhin Rs. 400 vel an hlawh pha niin a sawi a. A hlawmna hralhna man a hniam pawhin vantlangah a man a tlawm ve chuang lo nia sawiin kharchhawngte chet dan a dem.