Aizawl: MNF adviser, minister ni bawk, Lalruatkima’n ZPM party hotuten kalphung thar an sawi chu thuneihna leh lalna chauh duha tuihalna a ni tih a chiang nia sawiin, “Nationalist kan ni, tia Zoram Nationalist Party lama min kalsana ZPM member ni tate, an pianna ram MNF-a lo kir leh turin thinlung takin kan sawm,” a ti.
MNF Tuirial East Block Conference nimina Nisapui-a neihah he thu hi Lalruatkima chuan a sawi a. ZPM chuan nationalism an sawi ngai tawh lo va, an zuar hek lo nia sawiin, “Sawisel tur leh phunna tur ringawt zawng hmuha miin an hmuh ve hma che u hian Zoram Nationalist-te in pianna ramah lo kir leh turin kan sawm che u,” a ti.
ZPM-in kalphung thar an zuar a, social media lamah chuan sorkar mah se, nikum maia MADC inthlanah pawh inthlan dawna an lawm luh zawng zawng aiin an vote hmuh a tlem zawk niin a sawi a. Chakma vek awmnaah Zonu unit an din nia sawiin, lalna leh thuneihna an thlakhlelh luatah an sawi tawh thin zawng zawngte an mahni ngeiin an phatsan zel niin a sawi.
MNF adviser chuan Congress party chungchang pawh sawiin, “Pu Lalsawta, pa tha tak maiin a hruai a, a kang hleithei chuang lo, India ramah an hniam telh telh a, that loh theih lohna bawm an zuar a, tha thei reng reng lote kha an awmkhawm a. Sorkar meuh tur chuan an beisei awm lo,” a ti a. “An bial tha thin minority bialah pawh BJP-in a ei te zel a, keini kan pung zel,” a ti.
Kohhran, tlawmngai pawl leh sorkar thawhhona tha malsawmna an dawng nia sawiin, Lalruatkima chuan, “Min thlahthlam ngai lo Pathian hian kawng chanveah min kalsan lo vang,” a ti a. MNF-in inthlana manifesto a siam pawh an tihlawhtling deuh vek tawh nia sawiin, Lunglei Municipal Council pawh an tiam ang ngei an din a nih thu leh a hringtu MNF ngeiin mipuite duhsakna changa sorkarna an siam a rin thu a sawi bawk.