Liverpool midfielder Stefan Bajcetic chuan a malpuiah hliam a neih avangin tun season chhung football a khel tawh dawn rih lo.
Kum 18 mi Spanish midfielder hi tun season-ah a club lamin season harsa an hman laiin an chanchin lawmawm neih zing ami a ni a. August thla khan first team tan inkhel tanin tunah an team a player tangkai a ni tawh.
Inelna hrang hrangah first team tan vawi 19 inlan tawhin December thla khan senior team tana a goal hmasa ber a khung a. Liverpool midfield, hliam leh thildangin a tihbuai nasat tak kara beiseina siamtu a ni thin.
Tunkarah training-ah inhliamin Nilaini zanah Real Madrid lakah pawh a inkhel thei lo tawh a. Amah Bajcetic chuan sawi chiangin, “Ka tan season duhawm tak ni lai chu a tawp a, mahse hei hi football in a ken tel a ni. Taksa leh rilruah a aia chak zawkin ka lo kir leh ang.” a ti.