Pakistan-a Lahore khawpui court chuan ni hnih chhung police-in an prime minister hlui, Imran Khan-a man an tumna chu Ningani tuk thleng atan a titawp rih.
Venhim hna thawktute chuan Thawhlehni chawhnu khan Pakistan Tehreek-e-Insaf (PTI) party hruaitu hi Islamabad court-in March 18 hmaa inlan tura a tih angin an custody-a lak tumin an thawk chhuak a. Khan-a hi sorkar thilpekte hralha an puhna thubuaiah hian a chungthu sawinaah a inlan duh lo tawh thin a ni.
Lahore khawpuiaman tuma an thawk chhuak chu a chenna, Zaman Park tualah amah thlawptu tam takin an lo dang a. An innawrnaah mi eng emaw zatin hliam an tuar a, police chuan mittui tlaknaa an phuh bakah tui laipuiin an kap a, Khan-a thlawptute pawhin lungin an tawng let.
Innawrna hi Nilaini thleng khan chhunzawm a la ni a; mahse, PTI-in petition an thehluh chu ngaihtuah niin Lahore High Court chuan man tuma beihna hi Ningani chawhma dar 10:00 (India-a chawhma dar 10:30) thleng man tumna chu a tikhawtlaisak ta a ni.
PTI hian Islamabad High Court-ah pawh bail theih lova man tura tihna chungchangah petition an thehlut bawk a. Hei erawh court chuan hnawlin Khan-a chu court hniam zawkin a koh angin March 18-ah emaw, a hmain emaw a kotute hmaa inlan turin a ti.
Lahore court-in thutlukna a siam hma lawk hian man tuma thawk chhuakte hi an insaseng hman a. Province thuneitute chuan chawhnuah cricket inkhel lian tak a awm dawn avangin an insaseng niin an sawi.
Boruak chu la tang hle mah se Khan-a in tual velah chuan PTI mite chuan ni hnih a zawna Khan-a man tumna an dan theih avangin lawmin an phusa nasa hle.
A hmain Khan-a hi a mite hmaa inlanin sorkar chuan inthlan a chuh theih lohna turin thil an ruahman mai mai niin a puh.
“Eng warrant kengin nge police hi an lo kal?” tiin cricketer atanga politician-a inlet hruaitu hian a sawi a. “Eng tin nge mi firfiak tu emaw a tawm ni awm ang maia hetianga an cheta venhim hna thawktu an lo thawh chiam, engnge ni ngai?” tiin tear gas shell tla tam tak kara dingin a sawi a ni.
Khan-a hi kum 2018 atanga nikum April thleng khan prime minister a ni a, parliament-ah amah rintawk leh tawk loh buknaah chak lovin a bâng zui a. A laka thubuaiah hian surety bond ziakin March 18-ah court-ah inlan a tum tih a sawi a; mahse, police chuan chu chu an pawmsak lo niin a sawi.
“Dan angin arresting officer hnenah surety pek ka tum a, min man an tumna an tawpsan nan court-ah ka kal dawn tih ka sawi a; mahse, an ti duh tlat si lo a ni,” a ti.