Aizawl: Millenium Centre, Aizawla Mizoram Trade Facilitation Fair chu nimin khan Commerce & Industries Minister Dr R Lalthangliana’n a hawng a, vawiin thleng a awh ang.
Trade Facilitation Fair hi Selco Foundation, Atal Incubation Centre-SELCO Foundation, Planning & Programme Implementation deptt., North East Initiative Development Agency (NEIDA) leh Mizoram Science, Technology & Innovation Council (MISTIC) te tangtlangin an buatsaih a ni a. Kuthnathawktute leh entrepreneur te tana tangkai tur, ni zung chakna hmang khawl pawh chi hrang 25 chuang pho chhuah a ni.
Mizoram chhung leh pawna private company hrang hrang leh tual chhunga mi malin khawl an siamte pawh pho chhuah a ni a, khawl hrang hrang hnathawh dante entir a nih bakah sawihona hunte buatsaih a ni bawk.
Commerce & Industries Minister Dr R Lalthangliana chuan Mizoramin kum tina kawlphetha chawk luhna atana a sum hman thahnem tak chu ni zung chaknaa siam khawl chi hrang hrang hmanga phuhruk a nih chhoh zel a beisei thu a sawi a. Lo nei mite pawhin he trade fair a an chhawpchhuah khawl, hman awlsam tak turte chu an tangkaipui ngei a rin thu a sawi.
He hun buatsaihsaihtuten an sawi danin fair-in a tum ber chu – kuthnathawka eizawnna bultante leh sumdawng tenauten an eizawnnaa harsatna an tawha puih an nih theih dan tur leh hmasawn zawnga huang an zauh theih nana innovator-te nena inkawmna hun siamsak an ni.