Aizawl: Indian Medical Association (IMA), Mizoram Government Doctors’ Association (MGDA) leh Indian Dental Association (IDA) tangkawpin nimin khan Hnahlan PHC leh Hnahlan Higher Secondary School-ah te special clinic an buatsaih.
Champhai North bialtu MLA Dr. ZR Thiamsanga chuan a bial chhung, Hnahlan khua leh a chhehvelte tana special clinics liantham tak, mipuite hriselna kawnga pawimawh leh remchang tak buatsaih a ni chu lawmawm a tih thu a sawi.
Special clinic hi hlawm lian takin hmun hnihah neih a ni a. Hnahlan Special Clinics bikah hian specialist leh super specialist/doctor 38, supporting staff pariat leh driver paruk an tel a, team member-te hi sorkar, mi mal leh private hospital-a thawktute atanga kalkhawm an ni.
A thlawna inentir a nih bakah hian damdawi eng emaw zat a thlawna sem a ni a, damdawi sem chhuah tur lei nan hian H&FW Board Vice Chairman Dr. ZR Thiamsanga’n Rs. 1,50,000 a tumsak.
Hnahlan Higher Secondary School-ah skin (vun), paediatrics (naupang lam) leh opthalmology (mit lam) entirna hawn a ni a. Hnahlan PHC Building-ah ENT (beng, hnar, hrawk lam), Obstetrics & Gynaecology (hmeichhe lam), General Medicine (natna tlanglawn), General Surgery (inzai lam), Orthopaedics (ruh lam) leh dental (ha lam) entirnate bakah khawl hrang hrang hmanga inentirna, Sonology (kawchhung enna), ECG (lung enna), Physiotherapy, Endoscopy (ril enna khawl) leh Audiology (ri hriatna lam) entirnate hawn a ni bawk.
Nimin chawhnu dar 3 thleng khan mahni hriselna thlithlaia inentir mi 2,000 bawr vel an awm tling tawh a ni a. Special Clinics hi Hnahlan leh khaw dang 15-te bakah thenawm ram, Myanmar khaw pathum atangtein pantu an awm bawk.