Liverpool tan UEFA Champions League a an zinkawng a tawp a, a titawptu pawh a ngai tho an ni. A zawna season thumna atan Real Madrid chu hneh zo lovin round of 16-ah an tla.
Merseyside khaw club hi first leg-ah mahni mualah 5-2 in an tlawm a. Madrid khawpuiah sut theih inbeiseina neiin kal mahse goal an khung thei lo. Real Madrid zawkin Karim Benzema goal khung hmangin 1-0 in hnehna an chang a, 6-2 aggregate in Los Blancos an chak.
A sen in a var an ngam lo… leh tawh
Santiago Bernabeu-ah Liverpool in goal thum a an hniam zawkna nawhreh theih hlauh inbeisei in inkhel an hmachhawn a. A tum pawh an tum.
Forward pali an starting XI-ah dahin Cody Gakpo, Mohamed Salah, Diogo Jota leh Darwin Nunez ten bul an tan vek.
Amaherawhchu tumna ringawtin awmzia a nei thui lo. An inkhelh chhungin Real Madrid tlarhnung tih tak zetin an tibuai hleithei meuh lova. Second half minute 78-naah Real lam zawkin an huntha neih an hmang tangkai a. Fimkhur leh fing taka football khel chungin a hun takah an che a, Vinicius Junior ball pawh letsak chu French striker Benzema chuan inkhel a goal awmchhun ni turin a khung.
Jurgen Klopp-a pawlte hian goalkeeper Alisson an neih avangin goal an chhuahbelh lo zawk a. First half-ah Vinicius leh Eduardo Camavinga te goal khung tur a save tha hle.
Liverpool tana uiawm ni zui ta erawh inkhel tan tir a Darwin Nunez-a chance hlah a ni a. Goal khung hmasa nise Madrid khawpui a inkhel a danglam thei mahna tih ngaihtuahna an nei ang.
Reds hi nikum khan final-ah Real Madrid kutah an lo tlawm tawh a. A kum hmasa khan quarter-final ah Real Madrid hian an hneh tawh thung.
Inkhel zawh lam
Real Madrid manager Carlo Ancelotti chuan an khingpuite khelhdan chu an tana hman tangkai theih a ni tih an hmuh thu a sawi a. “High press an khelh kha an tan a pawi. A chhan chu min rawn hnaihchilh a, min nawr tawm vak tum mahse Modric leh Kroos te hi hetianga tih tum khingpui lakah an insiamrem thiam hle a. An press hian tibuai lovin ball an sem thei tlat.”
“An chiai ve mai mai lova, buai miah lova ball an sem theih tho avangin Liverpool tan khan a pawi ta a ni.” tiin inkhel a thlirlet.
Liverpool manager Jurgen Klopp chuan, “Round dawtleh lut tur chuan tha chungchuang bika khelh a ngai. Real kha team tha zawk an ni a, a tlin phu zawk an tling a ni mai.”
“Goal thum phur sa in kan lo kal a, thil danglam bik tak a thleng a nih loh chuan result tihdanglam kha a huphurhawm tawh.” a ti ve bawk.