Tripura-a lirthei khalhtu pakhat chu nasa taka ransa sawisaa puh a nih avangin man a ni.
Driver hi a lirthei hnung lamah hrehawm taka ui phuar beta kawngah a inkhalh chhunga hnuk anga puh a ni a. Hetianga a tih avang hian ui pawh hi a thi.
Tripura chhim lam, Agartala leh Sabroom inkar national highway-a hetianga a tih hnua ui thi thlalak hi darhin social media-ah pawh sawi zui a hlawh hle a. He thil hi Thawhlehnia thleng kha a ni.
Police chuan kum 45 mi, Subrata Nama chu dental surgeon pakhatin complaint a thehluh bawhzuiin an man a. IPC section hrang hrang hmang leh Prevention of Cruelty to Animals Act hmanga thubuai siamsak niin tual chhung court-ah hruai a ni a, bail-a chhuahtir lehnghal a ni.
Tripura-a thil thleng hi ran chunga rawng taka chetna thar niin hetiang kaihhnawih hi India-ah hian a tam hle.
January khan ui tho bike-ah thlungin hnuh chiam a lo ni tawh a, hei hi Bihar-a Gaya-a thleng a ni thung.
Delhi-a Dwarka-ah pawh December khan hetiang hi a thleng a, khawlaia ui note tla pahnih chu phuar beh niin an thi hial a, an ruang chu khawlaiah khai a ni bawk.