ZPM thalaiin MNF sorkar chu Lengpui Airport-a hman tur trolley to uchuak taka leiah leh restricted tender hmanga a dang lei leh tum mekah an puh.
Hemi chungchanga thuchhuah an siamah ZPM thalai chuan, zin mite hman tur nawrlirh (trolley) chungchanga RTI hmanga an zawhna chhannaa a lan danin MNF sorkar hnu February 26, 2020-ah Lengpui Airport-a zin mite hman tur trolley 50 chu pakhat Rs 24,600 hisapa lei a ni tih sawiin, “Trolley hi R.R Enterprise, New Delhi-in an supply a ni,” an ti.
Trolley chu a man pangngai Rs 5,000 tling lo a nih laia to uchuak taka supply a nih avanga puanhnuai thil a awm ngeia an ngaih thu ZPM thalai chuan an sawi a. MNF sorkarah man to tak taka bungraw supply a ni thin nia sawiin, pawi an tih thu an sawi.
ZPM thalai chuan, “Trolley man tote chu airport cute saknaah hman chhiat deuh vek a nih avangin tunah hian a thar lei turin sorkarin ruahmanna a nei mek a, restricted tender hmangin trolley chu lei a tum leh mek,” an ti a. A hmutu tur hriat sa tender hmanga trolley lei tumnaah thil fel lo lian tak a inphum ruk leh ngei an rin thu sawiin, hemi chungchang hi uluk taka thlithlai an tum thu leh thil fel lo a awm a nih chuan mipuite thlavâng hauha an chet chhuah tur thu an sawi bawk.