Power & Electricity department chuan nimin khan Engineer-in-Chief Conference Hall-ah an hnathawh dan leh hnathawh mekte an thlirho a, P&E Minister R Lalzirliana’n tun dinhmunah Mizoramin êng a hmu tha niin a sawi.
P&E minister chuan tunlai khawvelah kawlphetha tel lovin eng hna mah a thawh theih loh tih theih hial a nih tawh avangin power supply pek chhuah tur a pung tulh tulh a, hei hi thawktute tan pawh chona lian tak a nih thu a sawi a. Power department-a thawktute chu bahlah lova mipui mamawh phuhruk tura theihtawp chhuah zel tura chahin, inhmakhua nachang an hriat avanga transformer thar bunna hmun tur zawn kawnga an taimakna a fak bawk.
P&E Commissioner & Secretary H. Lalengmawia pawhin hnathawh theih hun chhunga mamawh chah khawm kawngah te, a hun taka contractor-te bill pek leh hnathawh vil uluk kawngah te tan la turin thawktute a chah a. Power corporatisation lamah pawh hmalak thar a ni thuai dawn tih a sawi.
Thutkhawm kaihruaitu, E-in-C Er. Lalhmingliani Hmar-in P&E hnuaia thawk zawng zawngte, division hrang hrangte hnathawh that lama inelna tur siam a ni dawn tih sawiin, “Department chhungah inchawhthawh nana hmalakna thar a ni ang a, hnathawk thate tan lawmman siam a ni ang,” a ti.
Thutkhawmah hian P&E department-in North East Transmission Company (NETC)-a ‘shares’ a lei atanga kum 2022-2023 chhunga dividend a hlawh chhuah, Rs 4,93,68,000 chu NETC Asst. Manager Bikash Kumar Nayak chuan P&E minister hnenah a hlan nghal a ni.