US sorkar chuan Los Angeles mayor hlui, Eric Garcetti chu India-a a palai (ambassador) atan a ruat fel ta a, kum hnih zet kal taa rawt a nih hnua tihchian a ni ta chauh a ni.
Garcetti-a hi Joe Biden-a lamtang hnai tak a ni a, president hian kum 2021 daih tawhah khan Delhi-a palai hna thawk tur hian a lo rawt tawh.
Mayor pisa a luah lai khan a thawhpui lakah mipat hmeichhiatna lamah mawi lo takin a che nia sawi a nih avangin rawt a nihna hi tihkhawtlai a ni ta reng a ni.
Garcetti-a erawh chuan an puhnaah phain engmah tih sual a nei lo niin a insawi.
Nilaini khan Senate chuan kum 52 mi hi ambassador turin vote lakah 52-42 in an thlang a, Democrats thenkhat chuan amah duh lo zawngin an vote.
Ram pahnihte hi venhimna leh sumdawnna lamah nghet takin inthlunzawm man se US hian January, 2021 atang tawh khan India-ah hian palai dah a nei tawh lo.
Mi thiamte chuan Biden-a hian sumdawnna kawnga a kawppui lian ber, India nena inkungkaihna tihlen zel hi a duh a, hemi rual hian Washington hian a thenawm, China-in huang a zauh zel tur ven a duh bawk niin an sawi.
Garcetti-a ruat a ni hi Russia chungchanga Delhi leh Washington ngaihdan a phir lai tak a ni a. India hi Russia-in Ukraine a rûn thu-ah a ngawih tlat avangin US hi a lawm tehchiam lo a ni.
Delhi hian indona awm mek hi a demna thu a la sawi chhuak miah lo va; mahse, ‘UN Charter, international law leh mi ram chin theuh leh an inpumkhatna zahsak’ erawh a tul thu a sawi tawh thung.
India hian sipai hmanruate chu Russia atangin a lei nasa hle a, US leh Europe ram thenkhatten lei an khap laiin tuialhthei thlitfim loh pawh a hlawmin a la leisak chhunzawm reng bawk.
“United States-India inkungkaihna hi a pawimawh tak zet,” tiin Senator Chuck Schumer chuan vote thlak zawhah a sawi a. “Ambassador kan nei dawn tih hriat hi thil tha tak a ni,” a ti bawk.
India-a an ram palai tura thlan a nih hnu lawkah hian Garcetti chuan puhna tawngin rei tak an rawtna tihkhawtlai ni mah se palai ni tura an tihna chu phat a tum lo tih New York Times chanchinbu hnenah a sawi.
“President nen kan lut dun a, ka hnungah a tawp thlengin a ding a ni,” a ti.