India-a mi mal enkawl airline chuan an thlawh laia cockpit chhunga coffee leh chithlum an lo ei nia puh an nih avangin an pilot pahnih an chawlhtir.
Kar tirah khan SpiceJet thlawhna chhunga control panel lang tela coffee leh a hmeh an ei lai thlalak hi a darh a, hrem an ni zui ta a ni.
Thla an lak lai hian feet 37,000-a sanga an thlawh lai nia sawi a ni.
Thlalak a darh hian mi tam tak an thinrim hle a, India-a thlawhna thununtu pawhin airline hnenah hian vaukhanna a pe.
SpiceJet hian Nilaini khan he thil hi an en zui thu leh thlalaka lang (an hmel chu a lang lo) nia an hriat pilot pahnih chu an chawlhtir tih a puang.
“Thil chhui zawh a nih hma chu an chungah disciplinary action lain chawlhtir an ni,” tiin airline thupuangtu chuan The Times of India chanchinbu hnenah a sawi.
Indian aviation rules-ah pilot leh thawktu dangte hi cockpit chhungah chaw leh a hmeh ei phalsak anni a; mahse, dan zam khauh tak a awm a. No ang chi, a buak palha khawl tibuai thei ang chi phei chu phal loh a ni.
Tun tuma thil thleng hi Delhi atanga hmarchhaka Guwahati pana Hindu kûtpui, March 8-a thlawk kha nia sawi a ni.
Thlalakah hian coffee no, airline logo chuang chu khuh lovin thlawhna tihnunna (start lever)-ah hun a ni a, pilot-te chuan Holi hun laia an ei thin, gujiya an inchhawp bawk tih a lang.
Thlalak a darh chiah hian social media-ah mi tam tak chu pilot-te khawsak dan avangin an thinrimzia an aupui nasa hle.
Twitter-a dah chhuak hmasa ber, aviation expert Mohan Ranganathan chuan, “Thlawhna insawi hlek se coffee kha electric khawlah a bua ang a, khawl a tibuai vek dawn a. Dan bawhchhiatna a ni,” a ti.
Thawhlehni khan Directorate General of Civil Aviation chuan SpiceJet hnenah thawktute chu zawng chhuak thuai tura tihna lehkha a thawn.
Hemi hnuah hian chawlhtir an ni nghal tih SpiceJet thupuangtu chuan The Hindu chanchinbu a hrilh a, thla lak hun tak erawh hriat a la ni lo.
“A thar nge hun rei deuh tawha lak tih hriat theih a la ni lo va, thu zawh chian mek niin a chiang thuai ang,” a ti.