Crystal Palace chuan a zawna match 12 chhung chak hmel an hmuh tawh loh avangin an manager Patrick Vieira chu an ban.
Palace hian kuminah hnehna an la chang miah lova. Nilaini zan khan Brighton & Hove Albion lakah 1-0 a tlawmin a zawna vawi thum an tlawmna a ni.
Premier League table-ah 12-na an ni mek a, season chawhma lama an chetthat avangin an dinhmun tha an la ring thei. Nimahsela relegation zone chu point thum chauh a an hlat tawh avangin thutlukna an siam.
Chairman Steve Parish chuan, “A tawpah chuan tunhnaia kan result te hian kan dinhmun hi a ti khirh a, chuvangin Premier League a la inel kan duh chuan kan dinhmun thlak danglam a hun niin kan ngai.” tiin thutlukna an siam chhan a sawi.
Under-21s boss Paddy McCarthy chuan naktuk zana Arsenal an mikhual hunah team hi a kaihruai dawn a, Zirtawpni khan training a kaihruai tawh.
Vieira hian kum 2021 July khan club hi enkawl tanin match 74 atang vawi 22 a chakpui a, draw vawi 25 an nei.