Aizawl : Aizawl West-III bialtu MLA VL Zaithanzama chuan inthlannaa tlin hi a pawimawh a, tling tura inthlanna leh campaign-naah rilru hrisel a pawimawh niin a sawi.
ZPM in an pisa-a Friday political session nimina an neihah thu sawiin VL Zaithanzama hian, Lunglei-ah Municipal Council inthlan hmasa ber a awm dawn a, political party tana pawimawh ber chu inthlan hi a ni tiin, “Party te hi inthlana kan din loh chuan kan nawi telh telh tihna a ni. Tlin hi a pawimawh hle, tling turin inthlanna leh campaign-naah rilru hrisel a pawimawh a, rilru hrisel lo kan neih chuan hmasawn a har,” a ti.
VL Zaithanzama chuan tunlaiin ruihhlo avangin thalaite an thi nasa a, kumina thalaite an thih dan rate en hian thi an pung nasa dawn hle nia a lan thu a sawi a. Mihringin hma a sawn loh a, kan inhumhim loh chuan ram a him lo a, chuvangin, Mizo hnam hian eng kawng nge a zawh tih ngaihtuah a tul thu a sawi.
Sorkar hna lak dan leh a ram pum sum che vel en hian thalai tam tak hi an beidawng nia sawiin VL Zaithanzama hian, thalaite hian an thiamna leh an theihna hi Mizoram atanga ram dang thlengin lan chhuah tir duh mah se, an ti hleithei lo hi an puakkeh thin a. Hei hi ZPM chuan hriaiin beiseina siamsak an tum tih a sawi bawk.