- Mahmuaka Chhakchhuak
Lunglei Municipal Council hmasa ber atana Coucillor thlanna chu March 29, 2023 tih a niin rokhawlhna dang a awm loh chuan tluang takin kan nei thei turah ngai ila. Thla khat chhung pawh campaign na hun a awm lo chu Party tinin an chhiatpui theih laiin mipui lam tan chuan a pawi lo viau thei thung. A chhan chu Mizote hian hetiang Inthlan boruak hi kan zo tak tak ngai lo a, mi fel tak tak kara mi fel lo tlemte awmte thawm hi a ring hma bikin kan inpuhchhiatna leh kan inbeihna thawm hi a ring hma bawk si avang hian campaign na hun rei lo hi a pawi lo viau mai thei e.
Amaherawhchu Lunglei mipuiin Municipal hi kan la hmachhawn ngai loh avang erawh chuan Inthlanpui (MLA thlan) nena thuhmuna ngaih theih chiah si loh leh VC thlanna nena danglam deuh bawk si a nih avang hian veikhawr deuh tutin kan hmachhawn dawn a ni. Inthlanpuiah chuan a Area alo zau hlekin Party inbeihna pawh a lian a, Municipal-ah thung chuan a Area alo zim deuh hlek avangin leh Candidate-te khawtlang leh Kohhrana mi tha tak tak an nih a, thenkhatte Politician lutuk an lo nih loh deuh avang hian chuti taka Party ang zawnga kalpui a harna chen a awm thei ang. Inthlanpuiah chuan Party lam kan thlukna hi a lian duh viau thin a, Municipal ah thung chuan chuti takin Party thluk lo hi mipui zingah an lo tam mai. Chuvang chuan Lunglei khawpuiin a vawikhatna atana Municipal a nei tur hi thil chhinchhiah thlak tak a ni ang a, anmahniah beiseina pawh a sang nghal viauin a rinawm.
Mimal nilo, Party angin han sawi ta ila; ZPM chuan Councillor tur atana an vawrhchhuahte reng reng hi zirna lama thiamna sang tak nei an ni hlawm a, an thalai hlawm viau mai bawk. An zingah hian Ward – IV a Candidate, Pu Lalramzauva emaw chiah hi Party lama mi hriat hlawh a ni awm e. Midangte hi chu Party lama tawnhriat la nei lo an ni hlawm a, an mimal mizia leh an thu leh hlain awmzia a nei viau thei ang. BJP hian a kimbiaia Candidate an nei thei hi thil ropui tak a ni. Hmasawnna ropui tak ti pawhin sawi ila a dik thei tho awm e, a chhan chu Lungleiah hian BJP a awm tih pawh hre lo hi mi tam tak an awm a, hmanni lawka an District President berin a bansan atang phei chuan an thawm hi hriat tur a awm tawh ngai meuh lo a, tuna hetianga Ward tina Candidate an nei thei hi a lawmawm hle a ni. Rahsi Veng atanga mi pali ngawt mai an han vawrhchhuak hian hmun dangah mi leh sa an neih loh vang nge Rahsi Vengah hian an that bik vang ni ang tih min ngaihtuah tir bawk a, an tlin vek phei chuan khawtlang pawhin a lawmna siam hialna tham a ni ngei ang.
Congress Party Official Candidate hi han thlir leh ila; Mimal tak pawha mi chhuanawm tak tak an niin a tam zawk hi khawtlanga hun rei tak lo inhmang tawh an ni a, Politics lama tawnhriat nei hi a tam zawk an niin VCP ni laite, Block Treasurer ni laite, VC Member ni laite leh NGO leh Kohhran lama inhmang tak tak vek an ni. Congress Party hian Lalenkawli Pautu an vawrhchhuak hi an vanneihpui ngeiin a rinawm a, Zaithiam satliah a ni lo a, amah hi mi ngainat-awm tak niin khawihmunah pawh mi ngainat hlawh tlat thin mi a ni. NGO hrang hranga inhmang reng thin a nihna leh chawimawina chi hrang hrang lo dawng tawh a nihna atang ringawt pawhin Councillor ah hian lo tling ta pawh nisela a zumzuk hauhin a rinawm loh. Tunah ngei pawh Party hrang hrangin an sawm hnua Congress Party tana Candidate a ni hi a chhan a awm ngeiin a rinawm. Ward – VIII-a Candidate Elizabeth Vaninmawii pawh hi buk rit tak tura ngaih a niin Politician chhungkua atanga seilian a nihna chu tun hunah hian a tangkaipui ngeiin a rinawm a, amah avanga Party sawi hleithei lo hi an awm nual nghe nghe.
MNF Party hian Municipal hi nghakhlel ber tura an lan laiin a tak takah chuan an huphurh ber zawk em ni tih turin Candidate tifel har bera sawi an ni thung si. Lunglei khawpui chhunga MLA Pali lai an nei hi an vanneihpui dawn nge vanneihpui kher lo ang tih hi zawhna pawimawh tak awm a ni. An tan hian Municipal hi a pawimawh lehzual bikin Party dang zawng aiin thlir pawh an hlawh a, Ward- III-a an Sub. Hqtr Vice President meuh ding hian result hriat a ti chakawm phah bawk. Chutih rual chuan Party lam sawi hleihtheih loha an zinga mi thenkhat tel hian a thlirtu tan ngaihdan siam a har phah thung si. Candidate sawm pakhat zingah hian Politician ni lem lo, khawtlang leh Kohhrana mi fel tak tak mi an tel thluah avang hian Party dang ang bawkin mi hmingtha leh fel an thlang chhuak tih a hriat a, an Party mal ang ngau ngaua inthlan hi hmachhawn nisela chuan an tan a huphurhawm viau thei tura ngaih a nih laiin neutral atanga pawhchhuah an nei tel hian an tana campaign a phurawm phah ngeiin a rinawm. Entirna atan; Ward- XI-ah chuan Block President meuh an vawrhchhuah laiin Ward- II ah chuan Laldingngheti Pautu an vawrhchhuak a, a ni lah LDF Announcer alo ni bawkin amah hi biangbiak alo nuam hrim hrim bawk nen hian MNF Party hian boruak tha neih theihna an neiin a hriat.
Hetiang hian tawi tetein kan han sawi a, helai hmunah chuan kan sawi kim seng lo ni mai sela, sawi tur a tam viau thei ang. Municipal hi Local Council leh State Sorkar inkara awm a niin mipui tana rawngbawl tur a ni a, an dinhmun hi a pawimawh em em a ni. Tun hma lama kar zau lutuk thin kha alo zim deuh tawh dawnin mipui lam pawhin kan thatpui leh tangkaipui tur a nih avang hian a tir atanga Municipal tha kan neih theih ngeina turin kan ngaihven pawh a tha. State-a sorkarna chang mektu te’n Lunglei khawpui min hmangaih dan leh hmangaih loh dan pawh kan hre hlawm ngeiin a rinawm bawk. Kan Vote khat lek hian thil danglam a thlen thei tih hi kan theihnghilh loh a tha viau bawk ang; Vawiin thlenga a hming kan lamrik apianga a rapthlak thu kan la sawi reng Adolf Hitler kha Nazi hotu ni turin a khingpui kha Vote khat lekin a hneh a nih kha. British laka America a indan hlim khan, hnam hrang hrang penkhawm America rama chengte khan an ram tawng atan English nge German tih an buknaah English duhtu lamin Vote khat lekin hnehna an chang bawk a nih kha.
I Vote hlu tak kha i lungawihna takah thlak ngei ang che.