Mamit district thalai pawlin kum 2018 April-a thawh tan tawh, 132 KV sub-station Bairabi – West Phaileng via Mamit transmission line siam hna, sum awmsa vek tawh ni bawk si, tun thlenga la thawh zawh loh chu EE, Mamit power division inthlahdah vangah an puh a. Mamit power division-ah a ngaihna hria EE dah turin sorkar an phut.
132 KV sub-station Bairabi – West Phaileng via Mamit transmission line siam hnathawh mek hi nimin khan Mamit district thalai pawl hruaitute chuan an tlawh thu sawiin, sum awm sa vek ni sia hna a muang lutuk chu hriatthiam har an tih thu an sawi a. District pumhuap project lian khawih a nih laia a thlaktu tur awm lova SDO, P&E, Mamit division sawn a ni pawh an hriatthiam loh thu leh rang taka a aiawh dah tura Mizoram sorkar an phut thu an sawi.
He hna hi April ni 19, 2018-a tan, February 2022 ral hmaa zawh tura tih a nih thu Mamit district thalai pawl chuan an sawi a. Hna zaa 70 chunglam thawh zawh tawh niin, he hnathawhna atan hian Rs nuai 5495 chuang ruahman a nih thu leh P&E Department-in an thawh mek thu an sawi.
Mamit district thalai pawl chuan 132 KV sub-station Bairabi – West Phaileng via Ma- mit transmission line siam hnathawh chung- changa an lungawilohna leh sorkara an thil phut ten awmzia a nei lo a nih chuan Mamit khawpui pum huapa kawng- zawh an rel bawk.