Manchester United in Europa League quarter-final an lut a. First leg-ah dinhmun tha a an indah hnuah Spain-ah chesual lovin Real Bet0is 1-0 in an hneh.
Ningani zanah Estadio Benito Villamarín-ah round of 16 second leg hi khelh a ni a. Mualneitu lam hi Old Trafford-ah 4-1 a tlawm tawh an nih avangin an hmabak a ko hle.
First half-ah Real Betis in goal an khung hma chuan beisei tur an nei dawn tih an hria a, tiang tur chuan United pawh nawr an tibuai fo.
Inkhel tan tir lamah United an che sual teuh thin. Mahse anni pawhin inkhel a kal deuhin nidanga an football khelh thin ang an khel ve thei. Goal erawh first half-ah a lut lo.
Betis in goal hlauhawm an ngah zawk a, first half-ah kum 41 mi ni tawh, tawnhriat ngah Joaquin chuan goal ban a pet per.
United in second half-ah inkhel a goal awmchhun an khung a. Goal khungtu hi an rinrawl Marcus Rashford bawk niin minute 55-naah penalty area hmawr atangin kawh zetin a pet goal chiang.
Erik ten Hag-a pawlten first leg a an thawhrah sengin 5-1 aggregate in hnehna an chang.
Ten Hag chuan, “Kan team in chance tha engemaw zah kan siam nual. Marcus khan remchang a neihte khung lo mahse inrintawkna neiin a huaisen reng a, a tawpah a hlawhtling ta a ni.” tiin an chak hnuah a sawi.
Arsenal an tla
Emirates Stadium-ah Premier League hmahruaitu Arsenal in Portuguese club Sporting Lisbon an mikhual a. Penalty shootout ah a vanduai zawkah an tang.
First leg-ah Sporting mualah 2-2 in an inhnehtawk tawh a. Arsenal in minute 19-naah Granit Xhaka hmangin hma an hruai.
Inkhel ti hmuhnawm turin Sporting team an tang thei hle a. Away goal a awm tawh loh avangin beisei an nei sang.
Minute 62-naah Sporting midfielder Pedro Goncalves chuan thil ‘cial’ bik a thlen tir a. Meter 43 a hla atangin an si phurh sutna goal mawi a pet lut.
1-1 a hun pangngaia an tawp hnuah extra-time khelh a ni a, Arsenal defender Gabriel chuan vawi hnih a team a chakpui teuh.
Penalty an petin Sporting in an pet goal vek laiin Arsenal tan Gabriel Martinelli chuan an penalty vawi li na a khung lo. Sporting 5-3 in an chak ta a ni.
Gunners coach Mikel Arteta chuan, “Minute 120 chhung kan tum a, penalty nen, kan tlinna turin a tawk lo a ni.” a ti.
Europa League quarter-final draw
Manchester United v Sevilla
Juventus v Sporting Lisbon
Bayer Leverkusen v Union Saint-Gilloise
Feyenoord v Roma
Europa League semi-final draw
Juventus or Sporting Lisbon v Manchester United or Sevilla
Feyenoord or Roma v Bayer Leverkusen or Union Saint-Gilloise
Europa Conference League quarter-final draw
Lech Poznan v Fiorentina
Gent v West Ham
AZ Alkmaar v Anderlecht
Basel v Nice
Europa Conference League semi-final draw
Lech Poznan or Fiorentina v Basel or Nice
Gent or West Ham v AZ Alkmaar or Anderlecht