India hmarchhaka freshwater dil lian ber, Loktak humhim zelna tur atan leh ropui zawk a nih theih nan Manipur sorkar chuan ‘Sustainable Loktak Lake Restoration & Livelihood Improvement Project’ kalpui turin a pawm.
Ram dang atanga puihna hmuh tur nena tangin Manipur cabinet chuan Loktak Lake Eco-Tourism Project tia a kalpui mek chu Sustainable Loktak Lake Restoration & Livelihood Improvement Project tia hma lak zui turin a pawm a ni.
Chief Minister N Biren Singh-a kaihhruaiin cabinet hi an thukhawm a, Loktak tihchangtlun zelna tur leh a nih anga humna tur hi an pawm tih a bul hnaia thawk chuan a sawi.
Loktak dil hi kum 1983-a National Hydro Power Corporation hawn a nih atang khan a nih dan pangngai chu a tlahniam nasa tawh hle.
Loktak dil hi fur lai chuan a chim chin chu sq km 250 atangin 500 thleng a kai thin a. Manipur chhim lama awm a ni.
Project kalpui tur hi ram dang atanga sum hmuh nena thawh tur niin mawi lehzuala chhuaha dil chu khualzin hip nana hman tum a ni.
Dil cheibawlna tur pawm a nih hma lawk hian state sorkar chuan Shiv Sena, Manipur-in rawtna an lo thlen tawh chu a pawm a. Shiv Sena hian dil kualah hian ring road pakua siam belh ni se tiin sorkarah rawtin an pawmsak a ni.
Shiv Sena Manipur unit senior vice-president M Tikendra chuan dila tui chuan eng zat pawh senga hum an mamawh hle tih a sawi a, khualrel tichhe lo zawnga cheia khualzin hipna atana siam a tul thu a sawi bawk.
A sira kawng siam chuan eco-friendly tourist centre-ah a chantir thei dawn nia sawiin siam tura an rawt chhan pawh a ni tih a sawi bawk.
All Loktak Lake Area Fishermen Union Manipur (ALLAFUM) leh Champu Khangpok Floating Village Welfare Committee (CHFLWC) pawhin sorkarin Loktak hum a tumna chu an thlawp thu an sawi a, dil chungchangah politics-a inbeihna a awm a ngaih loh thu leh sorkar pawh lo neitute leh dil kama awm khuate chu dil chungchang committee-a aiawh telh turin an ngen bawk.