Tualchhung cricket a second division inelna Khaled Memorial Second Division Screening Tournament 2022-2023 chu Zirtawpni khan final khelh a ni a. Bawngkawn South Cricket Club in run 2 in Zemabawk Pitchers CC an hneh.
Suaka Cricket Ground, Sihhmui a final inkhel hmuhnawmah Zemabawk Pitchers in vawm an thlang. An top order batsman te che tha in opener Malsawmdinpuia’n run 33 a siam a. Lalbiaktluanga chuan run 43 a siam thung.
An innnings tawp lamah Bobby Vanlalhriata chuan run 25 siam bawkin over 50 chhungin run 188 an siam a, wicket 10 an hloh.
Bawngkawn South bowler Ngurthansanga chuan wicket 3 la in Johan Lalruatfela, Rohit Kumar ROy leh Vanlalpekhlua ten wicket hnih theuh an la.
Zemabawk Pitchers in an opener wicket hloh hma mahse Lalbiakfela a che tha a, ball 51 atangin run 52 a siam. Jerome VL Hriata chuan run 31 siam bawkin bul an tan dan a tha.
Nimahsela an run rate an chhawm nung reng thei lo chu a tawpah an tuar ta a. Vanlalpekhlua leh Lalremthara ten run 22 ve ve siamin a tawp lamah tan khawh mahse over 44-ah run 186 siamin an wicket an hloh zo.
Bawngkawn South CC in an bowler-ten a hun taka wicket an lak theih rah an seng a. An ball vawmin Zemabawk batsman-te a tibuai fo. Sachin Prajapati chuan wicket thum a la a. Laltlansanga, C. Lalnuntluanga leh Lalbiaktluanga ten wicket hnih an la.
Tournament tluan a run 192 siam a wicket 23 la Vanlalpekhlua chu Player of the Series a thlan a ni a. Zemabawk Pitchers batsman Lalramluahpuia Zote chuan run 275 siamin Best Batsman lawmman a dawng. Wicket 25 la tu Bawngkawn South spinner K. Lalthazuala chu Best Bowler a ni thung.