Tun hnaia Assam-a state education board pawl 10 exam-a zawhna put ru-a a mawhphurtu ber chu zirtirtu pahnih nia an hriat thu Assam Director General of Police GP Singh chuan Zirtawpni khan a sawi.
Pakhat zawk hi an man tawh a, pakhat erawh a awmna chin an la hre lo mek a, “Kan man thuai ang tih erawh ka chiang,” a ti.
Majuli-a Luhit Khabalu High School headmaster, centre in-charge ni bawk, Pranab Dutta chu an man tawh tih DGP hian a sawi a ni.
“Vawiin hian man a ni ang a, CID headquarters-ah lak niin kawl zui a ni bawk ang,” a ti.
An rinhlelh pakhat zawk, Kumud Rajkhowa hi Lakkhimpur-a Daflakata High School-a thawk niin Dutta nena inpawh tak an ni.
Singh-a chuan zawhna lehkha hal vap chu Dutta-a inah hmuh a nih thu leh forensic examination ti tura lak a nih thu a sawi bawk.
Zawhna hi an tiput a, mi dang hlan chhawngin a darh ta vak niin a sawi.
Class 10 state board exam-a general science zawhna chu a put hmasa ber a, a hnuah Assamese paper a put leh bawk tih Chief Minister Himanta Biswa Sarma chuan Ningani khan a sawi a ni.