A hun lova ruah leh rial tla leh thli na tak chuan India ram state eng emaw zatah buh lam chi kung a tichhe nasa hle, thei rah seng tawh tam tak a tichhe bawk.
A tuartu chief minister-te chuan chhiatna thlen dan hi a kimchang an ngaichang mek hlawm a, zangnadawmna pawh pek an tum hlawm.
Weather department chuan Jharkhand, Bihar, Uttarakhand, Uttar Pradesh, Andhra Pradesh, Punjab leh Haryana-a lo neitute chu an thlai seng hun sawn tlai turin an ti.
Assam-a lo neitute pawhin an thlai leh thei seng hun sawn tura hriattir an ni a, an seng tawhte pawh hmun himah dah thuai thuai tura tih an ni.
Sik leh sa inthlak nasain a hrin chhuah, khaw awm dan phung pangngai lo hian ei leh in chhek leh sum lak luh a nghawng mek zel a ni.
Madhya Pradesh Chief Minister Shivraj Singh Chouhan chuan sorkar thuneitu sangte thutkhawm kovin lo neitute chu zangnadawmna pek an nih tur thu a sawi.
Chhiatna thlen dan kimchang hi March 25-ah hriat theih tura ngaih niin zangnadawmna pawh sem nghal a ni ang.
“Lo neitute thlai chhia hi endik a ni ang a. An thlai 50% chuang chân chu hectare khatah Rs. 32,000 zel pek an ni ang a, a bak zawng chu crop insurance scheme hmangin puihna pek an ni ang,” a ti.
State sorkarin a puih tumna hi lawmawm mah se lo neitute tan engtham a ni dawn lo niin lo neitute chuan an sawi.
Rajasthan-a Bundi khuaa lo neitu pakhat chuan Rs. Nuai 7 loan a lak chu tun tuma thlai a seng atanga rulh a inbeisei laiin a chân ta vek tih a sawi a, a tan hmabak a êng lo hle niin a sawi.
Maharashta Chief Minister Eknath Shinde pawhin district thuneitute chu thlai chhia zir chianga endik turin a hriattir.
Ruah, rial leh thli hian wheat, be lam chi, balhla, grape, serthlum leh theihai a tichhe nasa hle a ni.