Punjab sorkar chuan Thawhlehni khan Punjab & Haryana High Court hnenah Waris De Punjab chief tlan bo mek, Amritpal Singh-a lakah National Security Act hman mek a nih thu a sawi.
State sorkar hian Singh-a ‘chhuah’ a nih theih nana petition lut a chhannaah court hi a hrilh a ni.
Habeas corpus plea hi Waris Punjab De dan hre mi, Iman Singh Khara chuan a thehlut a. Singh-a chu ‘chhuah’ a phut a, police-in ‘dan kalhin an kawl’ niin a sawi.
Court-a petition ziah luh ngaihtuahnaah hian Punjab Police hnenah Amritsar-a G20 Summit neih tur avanga venhimna khauh taka kalpui a nih laiin engtin nge Singh-a chu a tlan bo theih tih a zawt.
“FIR 5-6 a awm a, a lakah thubuai 5-6 ziah luh a ni a, engtin nge a relh bo talh theih? Police 80,000-te khan engnge an tih?” tiin Justice NS Shekhawat-a thutna bench chu a zawt.
A hmain sorkar aiawha ding, Vinod Ghai chuan court-ah hian Singh-a chu police custody-a a la awm loh thu leh a tlan bo mek thu a hrilh a ni.
Ghai chuan Singh-a lakah hian NSA Act hman a nih thu leh a lakah pawikhawihna panga avanga thubuai siam a ni tih a sawi.
“A kimchang erawh court-ah hian sawi a remchang lo,” tiin advocate general (AG) Ghai chuan a sawi a, Sikh hruaitu zawn hna chu an la kalpui zel tih a sawi bawk.
Court-ah hian Singh-a pa, Tarsem Singh pawh a inlan a, thu sawi pawh a tum a; mahse, court chuan a hmain engmah telna a neih loh avangin a din a phal lo va, sawi tur a nei a nih chuan dilna thehlut hmasa turin a ti.
Court hian petition ngaihtuah leh hun atan kar khat hnu a ruat a, sorkar atangin affidavit thar a phut bawk.