Tunkar leh karlehah khawvel football-ah ram hrang hrangte inelna hun hman a ni leh dawn a. Europe lamah uro 2024 qualifier an khel tan bawk ang.
Premier League club te atang England tana khel tura ko Manchester United striker Marcus Rashford, Chelsea midfielder Mason Mount leh Newcastle goalkeeper Nick Pope te inhliam avangin an inkhel thei lo vek dawn.
Rashford hi Pathianni zana Fulham nen FA Cup quarter-final an khelh tumin a inhliam a. England tana vawi 10 inkhel tawh Pope hi Zirtawpni zana Nottingham Forest nen an inkhelh tumin a inhliam ve bawk.
Mount hi inhliam avanga hun engemaw chen chawl tawh a ni a, a la dam chian loh avangin Chelsea lamah inenkawlna a chhunzawm dawn.
England manager Gareth Southgate chuan mi 25 telna squad-ah puang mahse Chelsea boss Graham Potter chuan England team a zawm loh tur thu a sawi tawh.
Player pathumte zingah hian pahnih chu a thlaktu tur an ko dawn lova, Tottenham goalkeeper kum 35 mi Fraser Forster chu Pope thlaktu atan ko a ni thung.
Anni bakah hian Manchester City striker Erling Haaland pawh thahrui hliam a neiha vangin Norway squad atangin a inhnukdawk.
Norway hian Group A-ah Spain leh Georgia te an hmachhawn dawn a. An striker rinrawl tel lovin an khel dawn.
Norway coach Stale Solbakken chuan, “Erling hian kan team tana theihtawp a chhuah thei lo tur a hriat in pawi a ti hle a, mahse inrintawkna kan la nei lian hle.” a ti.