World Happiness Report tihchhuah thar berah Finland chu khawvela ram hlim ber a ni nawn leh.
Kumin hi a zawna kum ruk chhung ram hlim ber a nihna a ni ta a. He nihna chelh tur hian tehna chi hrang hrang – GDP per capita, social support, hrisel taka dam rei zawng, zalenna, than duanna leh ei rukna tlem dan hmanga teha a sang ber tihna a ni.
Report thar hi Thawhtanni khan International Day of Happiness puala tihchhuah a ni a. India erawh a hniam hle a, 125-na daih a ni.
World Happiness Report hi UN Sustainable Development Solutions Network-in an tihchhuah niin khawvel ram 150 chuanga mi chengte dinhmun zir behchhana siam a ni tih CNN chuan a tar lang.
Kumina ram hlim zual hi kum hmasa lam nen a danglam tam lo va, Nordic ram an tihte chuan dinhmun sang an chelh deuh vek a. Denmark chu No. 2 niin Iceland chu No. 3 a ni bawk.
“Nordic ramte hi mi mal leh sorkarah inrintawkna sang tak an nei a. Kum 2020 leh 2021 chhung khan COVID-19 vanga thi pawh Europe khawthlang lam lakah chuan an tlem hle a, mi 100,000 zela mi 27 thi ang zel an nih laiin Europe khawthlang lamah chuan mi 80 zel thi ang an ni,” tiin report siamtute hian an ziak a ni.
Report siamtu zinga pakhat, John Helliwell chuan, “Mi dangte puih duhna rilru, a bik takin mikhualte laka that chhuah duhna rilru hi kum 2021 khan mak takin a sang thut a, 2022-ah pawh a la ni zui zel a ni,” tiin a sawi.
“Hripui avanga hun hrehawm hman a nih laiin a tha lam pawh a awm zel a, mi dang tana that chhuah duhna a sang hle a ni,” a ti.
Khawvela economy thang chak ber pakhat, India chu No. 126-ah awmin a thenawm hnai – Nepal, China, Bangladesh leh Sri Lanka ai pawhin a hniam zawk.
Russia-Ukraine indona avangin he ram hnih hian an dinhmun an hloh nasa duai duai hle a. Russia chu No. 72 niin Ukraine chu No. 92 a ni.