Aizawl: Parliament thutkhawm neih mekah Union Ports, Shipping & Waterways Minister Sarbananda Sonowal chuan Rajya Sabha MP K.Vanlalvena zawhna chhangin Assam rama Gharmura lei (bridge) NH 154 atanga Khamrang rama NH 54 bul thlengin Tlawng lui chu National Waterway No. 102 atana puan a nih thu a sawi.
National Waterway No. 102 atana puan hi km 87.136-a thui a ni a. Khamrang leh Sairang inkar Tlawng lui erawh chu tui a thuk tawk loh avangin National Waterway No. 102 hian a huam phak loh thu a tar lang.
K Vanlalvena zawhna dang chhangin union minister chuan Tlabung atanga Tuichawng inkar Khawthlang Tuipui tihhmasawn nan leh lui mawng tihfai nan Rs. vaibelchhe 6.17 pawm a nih tawh thu leh first installment Rs. vaibelchhe 1.23 chu pek chhuah a ni tawh tih a sawi bawk.
Bay of Bengal tuifinriat kama Sittwa lawng chawlhhmun atanga Myanmar leh Mizoram inrina thlengin Chhimtuipui lui chu lawng zawh theiha siam tumna a awm em tih Mizoram MP zawhna chhangin union minister chuan, Kolkatta atanga km 539-a thui Sittwa lawng chawlhhmun chu NE state-te tan pawha hman tangkai a nih theih nan Mizoram atanga km 121-a thui, Paletwa thleng KMMTTP Road laih mek a ni a. Paletwa atanga Chhimtuipui lui mawng lam hi Sittwa thlengin km 158-a thui niin, hei hi lawng zawh theih a nih thu a sawi a. Hei hian NE state atanga India ram hmun dang panna tur kawngpui a siam belh dawn a nih tur thu a sawi a ni.