Aizawl: Rs. vaibelchhe 16.06 senga High School Field, Zarkawta multipurpose ground dinna tur lungphum chu nimin khan Deputy Chief Minister Tawnluia’n a phum.
High School Field-a multipurpose ground hi Aizawl Smart City project hnuaia siam tur niin Lushai Engineers, Aizawlin an thawk dawn a ni.
Khelmual chhunga phullem phah tur, a dung metre 73 leh a vang, metre 33 niin lirthei ke li nei 80 leh lirthei ke hnih nei 47 leng tur parking ruahman a ni a, khelmual pawnah cricket practice pitch, jogging track, outdoor gym leh naupang infiamna hmun tur ruahman a ni bawk.
Lungphum phumtu, Dy. CM, UD&PA changtu ni bawk, Tawnluia chuan sorkar laipuiin khawpui tihhmasawnna Smart City project kalpuina tur khawpui 100 a thlan zingah Aizawl khawpui a tel ve tih sawiin, High School Field-a multipurpose ground sak tur pawh chu hmalakna hnuaia mi chu a nih thu a sawi.
Smart City hnuaiah hian project 30 chuang a awm a, chung zinga thenkhat chu tihpuitlin a ni tawh tih sawiin, Tawnluia chuan project sawm dawn lai chu estimate siam zawh tawh a nih thu leh tender hmabak a la awm thu a sawi a. Hmalak mai tur chhawpchhuah zinga langsar tak, Laldenga Cultural Centre, Lammual sira sak tur pawh a lungphum phum turin Union Home Minister Amit Shah a lo kal dawn niin a sawi.
Tun hma atanga infiammite leh zirlaite tualchaina High School Field siam thata tihchangkanna tur bultan a ni ta chu lawmawm a tih thu Tawnluia chuan a sawi bawk.
Lungphum phumna puala inkhawm, Zarkawt Community Hall-a neih chu UD&PA Secretary Lalmalsawma’n a kaihruai a, bialtu MLA C. Lalmuanpuia pawhin thu a sawi bawk.