Aizawl: Thenzawl Joint VC leh Joint YMA hmalaknain nimin atang khan chin hriat loha awm mek, Isak Malsawmtluanga chu khawtlang huapa beihpui thlaka zawn mek a ni.
Thenzawl Vengthara khawsa mek rawlthar kum 15 mi, Isak Malsawmtluanga s/o Ruatdika, chu Pathianni chawhnu dar 1 vel khan chin hriat lohin a awm a, Thawhtanni zan lam thleng khan chhungkhat laina, Thenzawl khaw chhung YMA Branch thenkhat leh mi tlawmngaiten a bona awm nia rin, Lungrang tlang lam leh hmun dangte an zawn hnuah hmuh anih loh avangin khawtlang huapa beihpui thlaka zawn hna thawh a ni.
Nimin lamah hmuh a nih loh chuan vawiin lamah zawn chhunzawm leh a nih tur thu Thenzawl-a Vantawng Editor Liantluanga Renthlei chuan a sawi.
Isak Malsawmtluanga te hi Sertlangpui khuaa awm thin niin, tun March thla tir khan Thenzawl-ah an pem a. Amah hi hang lam pang, feet 5 leh inches 3 vela sang niin, a bo lai hian kawrlum polar dum ban tluan, track kekawr pawl a ha a, chapal sen dal lam a bun nia sawi a ni.