Meghalaya assembly budget session chu a ni khatnaah Governor Phagu Chauhan-an Hindi-a thu a sawi avangin duh lohna nasa tak lantir niin Voice of the People’s Party (VPP) chu duh lo langsar an ni.
VPP MLA Ardent Miller Basaiawmoit chu larsap thusawi chungchangah Chief Minister Conrad Sangma nen nasa taka inhnialin rorelna in a chhuahsan zui a. Basaiawmoit chuan Meghalaya hi Hindi hmanna state a nih loh thu governor-in Hindi-a a sawi chu mipuite zah lohna a nih thu a sawi.
MLA hian sorkar laipui pawhin Hindi chu Meghalaya mite tawng atan a ti thei lo niin a sawi bawk.
Chief Minister Sangma chuan hetianga larsap thusawia duh lohna lantir chiam leh sawisel chiam chu MLA hlun tih atan chuan a lo rin ngai loh thu a sawi.
Assembly Speaker Thomas A Sangma chuan saptawnga ziak chu member tin hnenah pek vek tho a nih avangin governor chu Hindi-a thu sawi a remtihsak tih a sawi.
Hetih lai hian NPP MLA, Health Minister Ampareen Lyngdoh pawhin saptawnga ziak pek vek ni mah se an tan hriat thiam vek a harsat thu a sawi ve bawk.
India hmarchhak leh chhima Hindi hmang ve lo state-ten sorkar laipuiin ‘Hindi hman’ a tihluih duh lohna a tam hle.