Manchester United lei tum te hma la mekte chuan tunkarah club lei tumna lian zawk nen an dawr leh dawn a. Club lam hian Ningani zing dar 2:30 thleng indawrna thehluh hun atan an hawng niin an sawi.
Club lei tumte zingah hian tun dinhmunah Qatari banker Sheikh Jassim bin Hamad Al-Thani leh British billionaire Sir Jim Ratcliffe te an langsar ber a. An pahnih hian club hi kar hmasa khan inbiakna an neihpui ve ve tawh.
Chiang zawkin
Sheikh Jassim hian kar hmasa Ningani khan Old Trafford-ah leh club training-na hmunpui Carrington-ah te a aiawhte tirin inbiakna hi United nen hian an nei tawh a. United lei tura a ngamna thar hi Raine Ground hnenah Ningani zingkara hun bituk hma in a thehlut tura ngaoih a ni.
British mi hausa, United club tantu ni bawk Sir Jim Ratcliffe pawh hian Zirtawpni khan club hmunpui hi tlawhin hmaichhanah inbiakna an nei tawh a. Ani pawh hian lei ngamna a tharin a thehlut leh dawn nia ngaihna a awm.
Hetihlai hian tun dinhmunah chuan Qatar lam hi lei tura rinkai zawk an ni.
Hmun thenkhat a sawi danin United leina chungchang buaipuitu Raine Group hian anni pahnih chauh ni lo, lei tum dang pawh an awm theih an la beisei nia sawi a ni bawk a. Tun thlenga mipui hriat tura puanzar chian la ni lem lo, mahse United lei tum a hma la an la pen chhuah beisei a ni a. Hei bakah hian club neitu nihna lei pumhlum lova, shareholder zinga tel tura sum chhunluh tum pawh an awm nual a, heng zingah hian tuna United neitu ni mek Glazer chhungkua thawhpui duhtu US lama inkhuar Elliott Investment Management pawh an tel.
United neitu Glazer te chian nikum November thla khan club hralh turin an inhawng niin an insawi tawh a, sum hailuh dan dang pawh an dap zel tur thu an sawi tel.
Glazer chhungkua hian United manah hian Pound tluklehdingawn ruk vel an beisei a, nimahsela February 17 a dawrna hmasa luh hun an bituk a lei ngamna lo lut ho erawhin a man a an beisei zat hi an pha lo.
Sheikh Jassim hian a lei ngamna san a inhuam rualin a man an chhiar zat hi a ngam dawn em tih hriat a ni lova, Ratcliffe hian a tawngpawng san vak loh tur thu a sawi ve tawh bawk.