Aizawl: MPCC Media-in nimin khan Lunglei Press Club-ah thu thar thehdarhtute an kawm a, an chairman, Dr Lallianchhunga chuan Congress party-in mipuite duhsaknain Mizoramah sorkarna a lo siam tawh thin tih sawiin, “Duhthusam ni lo mah se Mizoram hmasawnna lian tham tam zawk hi Congress sorkar ruahman leh a tihhlawhtlin a ni deuh vek,” a ti.
Dr Lallianchhunga Congress sorkarin Lunglei khawpui tana hmasawnna a thlente sawiin Mizorama district dangten an neih ve miah loh, Lunglei High Powered Committee hi an din leh thuam chak a nih thu a sawi a, HPC hmang hian hmasawnna hna tam tak thawh a ni a, a tangkaizia hretu chu Lunglei mipui an nih thu a sawi a. Lunglei khawpui kawng a chep avangin Congress sorkar lai khan Lunglei By Pass Road siamna tura nasa taka hma lain NEDP atangin Rs. nuai 900 dah ni mah se Zoramthanga sorkar chuan hmang zui duh lovin, ‘Survey-na pawh a daih lo’ tiin hma a la zui duh lo niin a sawi.
“Congress sorkar liam ta khan Pukpui, Lungleiah Mizoram Engineering College tur din a ni,” tiin Dr Lallianchhunga chuan college building hi RUSA atanga dawn Rs. vbc 26 senga sak a ni a. He college hi February 3, 2019 khan Prime Minister Narendra Modi-a’n a hawng a. 2019-20 Academic session atanga Civil Engineering Department tan tura ngaih a nih laiin MNF sorkar hnuaiah tan theih a la nih loh thu a sawi.
Dr Lallianchhunga chuan Congress sorkar khan SYS Football Academy hlawhtling taka dinin footballer tha tak tak chherchhuah a ni a, |huamluaia mualah phullem phah te, Lena Stadium te, AP Tlangah tennis court te siamin infiamna hmunhma eng emaw zat a siam hman a. Mizorama convention centre hmasa ber pawh September 16, 2016 khan Lal Thanhawla’n a hawng tih sawiin, tuna Lunglei mipui chawmtu, Pialthleng atanga tui lakna pawh an hunlai a mi a nih thu a sawi.
ATL Road pawh Congress bul tan a nih thu te, Aizawl – Thenzawl- Lunglei World Bank road, km. 164-a thui hi Congress sorkar lai, kum 1997 atanga engkim ruahmanna kalpui a nih thu te, July 8. 2022-a CM Zorama’n a hawn tak, Education Complex & Guest House pawh Congress sorkar laia sak niin, education office leh school tam tak sak a ni a, MNF President Laldenga hming chawia Pukpuia Laldenga Park siamte chu an bul tan a nih thu leh, Lungleia sorkar building tam tak an sak hman thu a sawi bawk.
Congress Media chairman hian Covid-19 len lai khan Thorang bialtu MLA Zodintluanga, CLP leader-in Lungleia dah tuin RT-PCR khawl a pek chu MNF sorkarin bun loh dan ringawt a ngaihtuah a, Lunglei hmangaihtuten PIL an theh lut a, court-ah an nawr a ngai hial tih sawiin, “Thih leh dam inkara Lunglei mipui an awm laia an koh eih phak loh MNF sorkar hi Lunglei mipuite hian vote nawn hi an ba lo,” a ti.
Congress party hian a chhe thei ang bera beih a tawk thin a, hmasawnna hna thawk miah lo anga chhuah ni fo thin mah se, Lunglei mai ni lo, Mizorama hmasawnna lian tham zawng zawng deuhthaw hi Congress sorkar hnathawh rah a ni deuh vek zawk a ni tih hi mi thil chik mite chuan an hria tih a sawi.
Lunglei khawpui hian chhantu a mamawh tih sawiin Dr Lallianchhunga chuan, “Duat taka enkawltu tur a mamawh. MNF sorkar hian Lunglei mipuite hi hmangaihna leh duhsakna tak tak a nei ngai lo va. Vawiin niah ngei pawh Lunglei Municipal Council hi Lunglei mipui tam takin an duh lo chungin ‘kan sorkar laia kan din’ an tih theih nan Lunglei mipuite barh luih an lo ni dawn ta a, inthlan hmachhawn a lo ngai ta a ni. Lungleiin harsatna a tawh laia MLA ngawi reng te ang tho va, Pu Zoramthanga hnena engmah sawi ngam lo tur MNF atangin LMC Councillor tur i thlang lo vang u,” a ti bawk.